Folafola ‘e le Labour ‘e fa’asā kamupanī tetele mai le faia ‘o ni tau taugatā

‘Ua folafola ‘e le Labour, ‘o le ‘ā fa’asā kamupanī tetele, mai lo lātou faia pe fa’atūlagaina ni tau tetele ma taugatā ‘o ‘oloa pe ‘ā fai ‘e filifilia ‘i le faigāmālō ‘i le faigāpālota ‘o loma nei.  Na saunoa le ta’ita’i Chris Hipkins, ‘e iai pisinisi tetele na fa’amaonia lo lātou so’ona si’i ‘o tau ‘o ‘oloa, po’o lo lātou faia ‘o ni tau na sili atu ‘ona maualuluga nai lō le tūlaga ‘e tatau ‘ona ‘i ai, mō ‘oloa ‘e pito sili ‘ona mo’omiaina ‘e tagata. 

‘O le taimi nei, ‘e mafai ‘e se kamupanī telē ‘ua ‘alo ‘ese mai tauvaga ma isi kamupanī, ‘ona fa’atūlaga ni tau matuā maualuluga mō ‘oloa ‘e mana’omia ‘e tagata, ‘e pei ‘o taumafa ma suāu’u, ‘ae lēai se tūlāfono ‘o iai, ‘e fa’asā ai lea faiga pei ‘ona saunoa Hipkins. 

‘O le ‘ā suia ‘e le Labour lea faiga, ma ‘o le ‘ā ‘avea ma solitūlāfono le faia ‘e ni kamupanī tetele ma mālolosi, ‘o ni gāioiga fa’apea, ‘e totogi ai ni tau maualuluga, ‘e tagata Niu Sila, ‘o ‘oloa pito sili ‘ona mo’omiaina.

Na saunoa le so’o’upu ‘a le Labour mō matā’upu tau ‘i pisinisi ma tagata fa’atau, Arena Williams, ‘o le 97 pasene ‘o pisinisi ‘uma ‘i Niu Sila, ‘o pisinisi lāiti, mā ‘o le ‘ā lē a’afia ‘i lea pōlisi.  ‘E na’o pisinisi ‘o lo’o fa’atauina atu ‘oloa pito mo’omia ‘e pei ‘o taumafa, ‘eletise, suāu’u, fela’ua’iga, feso’otaiga, faletupe ma ‘inisiua, ‘e a’afia ‘i lea pōlisi. 

Link to RNZ (Article): https://www.rnz.co.nz/news/politics_election-2026/1410372/labour-pledges-to-ban-big-companies-from-charging-excessive-prices

IMAGE/ATA: Rachel Graham / RNZ