Pa’ū le lagolago mō le Labour ma le National ‘i le sā’ili’iliga pito lata mai

‘I se sā’ili’iliga pito lata mai ‘o finagalo ‘o le atunu’u, ‘i la lātou lagolago mō vāega fa’a’upufai ‘a’o tūlalata atu ‘i le faigāpālota tele, ‘ua mōlimauina ai, ‘o lo’o ‘i lalo ‘uma ‘o le 30 pasene le lagolago mō Pātī tetele, le National ma le Labour. 

‘O le sā’ili’iliga ‘o le The Post/Freshwater Strategy, lea na fa’atupeina ‘e le Infrastructure NZ, ‘ua fa’aalia ai, ‘e lē ‘ausia ‘uma ‘e ia vāega fa’a’upufai, le aofa’iga ‘o nofoa ‘e mafai ‘ona fauina ai se faigāmālō, ma ‘e ta’i 60 a lā nofoa. 

Talu mai le māsina ‘o Iuni, ‘ua fa’amauina le 7 maka ‘ua pa’ū ai le Labour ‘ae ‘o lo’o pito maualuga pea ‘i le 28 pasene.  National ‘e 27 pasene, ‘e lua pasene ‘ua pa’ū ai.  Greens ‘e 14 pasene, 4 maka ‘ua si’itia ai, NZ First 13 pasene, 1 ‘ua si’itia ai, ACT ‘e 9 pasene, 1 ‘ua si’itia ai, Opportunity ‘e 6 pasene, Te Pāti Māori, 2 pasene. 

45 pasene le lagolago mō Chris Hipkins ‘ia ‘avea ma palemia, 1 le maka ‘ua si’itia ai, 35 pasene mō Tuisinavemaulumotootua, 2 maka ‘ua pa’ū ai.  ‘O le to’atele lava ‘o tagata na āuai ‘i lea sā’ili’iliga na fa’aali ‘e iai lava lo lātou talitonuga, ‘e sesē le itū ‘o lo’o āga’i ‘i ai le atunu’u, ‘e tusa lea ma le 56 pasene.  ‘E 27 pasene ‘e talitonu, ‘o lo’o sa’o lava le itū ‘o lo’o āga’i ‘i ai le atunu’u ‘i le taimi nei.

Na saunoa le fa’auluuluga ‘o Fa’atōsina ‘o le Pālota ‘a le National, Simeon Brown, pau ‘a le pālota po’o le sā’ili’iliga ‘e taulia, ‘o le faigāpālota tele, ma ‘e tasi lava le fa’amoemoega ‘o le National, ‘ia manumālō.

Link to RNZ (Article): https://www.rnz.co.nz/news/politics_election-2026/1382772/possible-hung-parliament-as-labour-and-national-slump-in-latest-poll

IMAGE/ATA: RNZ /Dom Thomas