Taulia ‘uma pepa ‘o le ta’aloga ‘a le Warriors ‘i Eden Park

‘E ui ‘ua sifi le ta’aloga ‘a le Warriors ‘i Eden Park, peita’i, ‘e le’i tu’uitiitia ai le faigatā ‘i tagata matamata ‘ona tau sa’ili ni pepa ulufale pei ‘ona fa’aalia ‘i le Leitiō Niu Sila.  ‘E tatau ‘ona manumālō le Warriors ‘i le ta’aloga ma le Newcastle Knights ‘i le Aso Sā nei ‘i le semi-final, ‘ina ‘ia mafai ‘ona su’e siamupini. 

Na sifi le ta’aloga ‘i Eden Park, ‘ina ‘ia mafai ‘ona telē le avanoa mō tagata matamata, talu ai, ‘e na’o ni nai minute na fa’atau ai pepa ‘o le ta’aloga ‘i le vāiaso talu ai ma le Dolphins ‘i Mount Smart ‘ae taulia ‘uma. 

‘E 50,000 tagata ‘e ofi ‘i le malae ‘i Eden Park, peita’i na līpotia, na ‘āmata fa’atau atu pepa ulufale ‘o le ta’aloga ‘i le 12 ‘i le aoauli ‘o le Aso Lua.  ‘Ae ta ane le 1, ‘ua tumu ītūlau ‘i ‘upega ‘o feso’ota’iga ‘a le Warriors, ‘i finagalo lē fiafia ‘o le to’atele ‘e fa’apea ‘ua lē maua ni a lātou pepa ulufale.  ‘E o’o mai ‘i le pō anapō, ‘e le’i fa’amaonia pe moni ‘ua ‘uma pepa ulufale. 

‘O lo’o iai le popōlega, ‘ona ‘ātonu ‘o iai nisi ‘o taumafai ‘e fa’atau pepa ma toe fa’atau ‘ese atu, ‘i ni tau  taugatā tele.  ‘E o’o ane ‘i le aoauli ananafi, ‘ua o’o atu ‘i le valu ni fa’atauga ‘i luga ‘o le Trade Me mō pepa ulufale ‘o lea ta’aloga. 

Link to RNZ (Article): https://www.rnz.co.nz/news/sport/1392965/bigger-venue-same-scramble-tickets-for-warriors-must-win-semifinal-at-eden-park-snapped-up

IMAGE/ATA: One NZ Warriors Facebook