Fa’ailoa ‘i le minisitā popōlega ‘i le ono gaoia ‘o fa’amatalaga tāua ‘i le soifua mālōlōina

Na fa’ailoaina ‘e le Matāgāluega ‘o le Soifua Mālōlōina ‘i le Minisitā, Simeon Brown, se matā’upu na gaoia ai fa’amatalaga tāua ma puipui malu ‘i ai le matāgāluega ma na aofia ai le Zenith Technology. 

‘O lo’o su’esu’eina ‘e Leoleo le matā’upu ‘e fa’apea ‘e telē lava se fuainūmera ‘o faila ‘e iai le so’otaga ma fa’ata’ita’iga ‘a falema’i ‘o lo’o fa’agaioiina ‘e le ZenTech, ‘o se kamupanī fa’atūma’oti, ‘ātonu ‘ua gaoia pei ‘ona fa’amatalaina ‘e le Stuff.  ‘O lo’o aofia ‘i ia faila, ni fa’amatalaga ‘e puipui malu ‘i ai le soifua mālōlōina.

Na fa’amaonia ‘e leoleo, ‘ua lātou silafia lea matā’upu mā ‘i se pepa ‘o fa’amatalaga na tu’uina atu ‘i le Leitiō Niu Sila ‘o lo’o tā’ua ai ‘e leoleo, ‘o la lātou su’esu’ega ‘o lea fa’ato’ā ‘āmata mā ‘o lo’o gālulue fa’atasi ai ma le Soifua Mālōlōina.

‘I se fa’amatalaga na tu’uina atu ‘i le Leitiō Niu Sila ‘i le pō anapō, na fa’aalia ai ‘e le ZenTech, na tapē ‘ese mai luga ‘o ‘upegatafā’ilagi a lātou polokalame ‘ina ‘ia fa’amautinoa le saogalēmū mā ‘o lo’o fa’agāsolo pea a lātou su’esu’ega ma ‘o lo’o iloilo po’o le ā se a’afiaga ‘o fa’amaumauga ‘a’o le ā fo’i le telē.  Na tā’ua ‘e le Zenith Technology ‘o le ‘ā fa’ailoa lava ni tala lata mai ‘e uiga ‘i le fa’afītāuli. 

Link to RNZ (Article): https://www.rnz.co.nz/news/politics/1323628/fears-sensitive-health-files-stolen-in-cyber-incident-minister-briefed

IMAGE/ATA: RNZ / Baz Macdonald