$2.5 miliona tupe sesē mai le MSD, faitau afe na a’afia ai

‘E silia ma le 30,000 tagata penefiti ma isi tupe ‘e tatau ‘ona totogi na sesē ‘ona taofia mō se taimi lē tūmau ma na fa’aleo ai ma ni popōlega ‘i le tolu māsina, ‘a’o le’i ‘aveina ‘i le vāega pito ‘i luga ‘e tatau ‘ona iloiloina ‘e tusa ai ma se su’esu’ega ‘a le mālō. 

‘E silia ma le 2400 penefiti ‘autū fa’atasi ma le faitau afe ‘o tupe na misi mō nisi tagata ‘a’o le’i toe totogi ‘ātoa ‘uma.  Na o’o ‘i le $2.5 miliona le pili aofa’i ‘o tupe tu’ua na tatau ‘ona totogi.

Na fa’alauiloa ‘i le aso ananafi le iloiloga ‘a le Matāgāluega ‘o Aga Feso’ota’i (MSD), ‘i ni fa’afītāuli tetele se lua, ia na alia’e ‘ina ‘ua māe’a ‘ona suia le tūlāfono ‘i le tausaga talu ai.  ‘I totonu ‘o lea suiga, na aofia ai le tatau ‘i le tele ‘o tagata penefiti ‘ona fa’amaonia le tūlaga ma le si’osi’omaga ‘o lo’o soifua ai ‘i le tausaga ‘ina ‘ia mautinoa ‘e tūmau pea ‘ona agava’a mō ia tupe. 

Sā lē tatau ‘ona aofia ai le Winter Energy Payment po’o le tupe lea ‘e maua ‘e fesoasoani ai ‘i pili mō le taumālūlū ‘i lea suiga, peita’i ‘e faitau afe nai tagata penisiona na lē maua lea fa’amāmā ‘avega sa tatau ‘ona lātou taulimaina.  Na fa’ato’ese le MSD ma toe totogi ‘uma tupe ‘a tagata, peita’i ‘e lēai se tasi ‘e maua se taui (compensation) talu ai, ‘e le’i fa’amaoniaina ‘i lalo ‘o le tūlāfono pei ‘ona fa’aalia ‘i le iloiloga. 

Na fa’ato’ese le Pule sili ‘o le MSD, Debbie Power ‘i tagata ‘uma lava na a’afia, ma ‘e iai tagata na o lātou faia lava le mea sa’o peita’i, sa a’afia lava a lātou tupe.  Na fesiligia Power po’o ai tonu ‘e pa’ū ‘i ai lea fa’alētonu, ‘ae na ia tali ‘i le Checkpoint ‘a le Leitiō Niu Sila, ‘o lona tiute tau’ave lea, peita’i ‘e lēai sana fuafauaga ‘e fa’amāvae ai.  ‘Ua valu tausaga ‘o ‘avea ia ma Pule Sili ‘o le MSD ma sā ia ta’ita’ia le matāgāluega ‘i taimi na tele ai lu’itau.  ‘Ua manino ‘i le iloiloga, ‘e tatau ‘ona fa’aleleia la lātou gāioiga ma ‘ua ia taumau fo’i ‘i ai ‘e fa’atino lea fuafuaga.

Na fa’ato’ese fo’i le Minisitā Louise Upston ma ia saunoa ai, ‘e lē taliaina le sasi lea na tupu ‘i ia tupe na tatau ‘ona totogi ma ia fa’ato’ese ai tagata ‘uma na a’afia ai ‘ona ‘o lea fa’alētonu.

Link to RNZ (Article): https://www.rnz.co.nz/news/politics/1324932/ministry-of-social-development-payment-errors-topped-2-point-5m-thousands-affected-review

IMAGE/ATA: RNZ / Rebekah Parsons-King