Silia ma le miliona fa’aopoopo ai le totogi ta’ita’i pito telē le totogi ‘i le lalolagi

‘O le taimi muamua lea talu mai le 15 tausaga ‘ua tuana’i, ‘ua fai ai se si’itaga ‘o totogi ‘o minisitā ‘o le mālō ‘o Singapore, pei ‘ona tā’ua ‘e le Palemia Lawrence Wong, ‘e ui ‘o nisi ‘o minisitā ‘e pito sili ‘ona tetelē o lātou totogi ‘i le lalolagi.  ‘O le saunoaga ‘a le Palemia, ‘e lē mafai ‘ona tōsina atu tagata ‘e pito sili ‘ona tālenia ‘i upu fai ‘o mālō, pe ‘ā fai ‘e tūmau ‘ona lēai se suiga ‘i totogi.

‘E 1.8 miliona tālā Singapore po’o le $2.43 miliona ‘o le ‘ā si’itia ‘i ai totogi ‘o minisitā ‘i le vāega pito maualalo (lowest grade) mai le 1.48 miliona tālā Niu Sila ‘o lo’o iai po’o le 1.1 miliona tālā Singapore.  ‘Ua si’itia maualuga ‘i le 3.6 miliona tālā Singapore po’o le 4.86 miliona tālā Niu Sila le totogi ‘o le Palemia, mai le 2.2 miliona tālā Singapore po’o le 2.97 miliona tālā Niu Sila ‘o lo’o iai nei.

‘O minisitā ‘o le mālō, ē ‘o le ‘ā mauaina ni si’itaga, ‘o ‘i lātou ia ‘o le ‘au faitūlāfono na filifilia ma ta’ita’ia matāgāluega, ‘ae lē gata ‘i lea, ‘o lo’o fesoasoani ‘i le faiga ‘o pōlisi ‘a le mālō, ‘ae ‘o le ‘ā si’itia fo’i ‘alauni ‘o isi fau tūlāfono.

Na fa’aalia ‘e Wong, ‘o le ‘ā ia fōa’iina le si’itaga fa’aopoopo ‘ātoa ‘o lona totogi, ‘i fa’alāpotopotoga fesoasoani mō le isi lima tausaga ‘o lumana’i.

‘Ua līpotia ‘e fa’apea, ‘o totogi ‘o faipule, ‘o se matā’upu ogaoga ‘i Singapore, ‘ona ‘e matuā maualuluga totogi ‘o minisitā nai lō tagata ‘o le atunu’u, ‘ae o le totogi ‘o le palemia, ‘o se tasi ‘o totogi pito sili ‘ona maualuga, ‘o ta’ita’i ‘o le lalolagi.

‘O le palemia ia Wong na ‘auai atu ‘i Sāmoa ‘i le fonotaga ‘a le CHOGM ‘i le 2024.

Link to 1News (Article): https://www.1news.co.nz/2026/09/09/highest-paid-world-leader-gets-salary-boost-of-more-than-1m/

IMAGE/ATA: PM Wong in Samoa at CHOGM 2024