Faitau afe tagata faigāluega ‘a le Mālō faia solo tete’e ‘i le atunu’u

‘E lata ‘i le 10,000 tagata faigāluega ‘a le mālō na faia la lātou tete’e ‘i le atunu’u ‘i le aoauli ‘o le Aso Lulu, ma ‘ua līpotia ‘e fa’apea ‘o le taimi muamua fo’i lea, ‘ua ‘āuai ai nisi ‘o ‘i lātou ‘i ni solo tete’e talu mai le fia sefulu ‘o tausaga ‘ua tuana’i.

Na fa’atūlagaina ‘e le PSA ni solo tete’e se 18 ‘i itū ‘ese’ese ‘e 16 ‘i le atunu’u, mā ‘o se vāega ‘o la lātou polokalame ‘e tete’e ai ‘i fuafuaga ‘a le mālō mō totogi ‘o tagata faigāluega, fa’apea le fa’atūlagaga ‘o tagata faigāluega fa’atasi ai ma fuafuaga ‘ia o’o atu ‘i le tausaga ‘e 2029, ‘ua suia le faitau afe ‘o tagata faigāluega ‘a le mālō, ‘i le AI po’o le poto fa’afōliga ‘o masini komipiuta.

Na tā’ua ‘i luga ‘o le Leitiō Niu Sila ‘e se tasi ‘o sui ‘o le PSA ‘e galue ‘i le MBIE, ‘ua silia ma le lima tausaga ‘e le’o suia lava totogi ‘o nisi ‘o tagata faigāluega ma ‘e iai nisi tagata ‘o lo’o lātou gālulue fa’atasi, ‘o lo’o feagai ma faigatā pei ‘ona saunoa Vaughan Trounson.  ‘E faitau afe tagata na potopoto ‘e fa’atino la lātou solo tete’e ‘i le taulaga ‘i Uēligitone ‘i le aso ananafi. 

Na tā’ua ‘e le failautusi ‘o le PSA ‘i le atunu’u, Duane Leo, ‘o le tele ‘o tagata faigāluega ia ‘e ‘au ‘i le iuni, ‘e i le vā ‘o le ta’i $65,000 ma le ta’i $75,000 o lātou totogi ‘i le tausaga.  ‘O le to’atele ‘o tagata ia ‘e solo tete’e, ‘o ē gālulue ‘i le ‘ōfisa ‘o femalāgā’iga, mā ‘o le to’atele ‘o ‘i lātou, ‘e maua le totogi ‘e tusa ma le ta’i $70,000 ‘i le tausaga.  Na fa’aalia ‘e le to’atele ‘o tagata faigāluega, ‘ua matuā āfāina lava ‘i lātou, ‘ona ‘o le taugatā ‘o le soifuaga.

Link to RNZ (Article): https://www.rnz.co.nz/news/politics/1310097/more-than-praise-we-need-a-raise-thousands-of-public-service-workers-strike-across-the-country

IMAGE/ATA: RNZ/Nathan McKinnon