Fa’ate’ia tagata mai ‘i fafo atu ‘o Niu Sila ‘i le Pōlisi a le NZ First ‘e fa’atatau ‘i le Supa’anueta

‘Ua fesiligia ‘e tagata malaga mai fafo ma aumau ‘i totonu o Niu Sila, fa’apea isi tagata atamamai, le māfua’aga ‘o le pōlisi fou ‘a le NZ First ‘e fa’atatau ‘i le penisiona ‘a tagata mātutua po’o le Supa, ‘e manatu le ‘au fai tōfā ‘e lē talafeagai ma ‘e lēai se fa’amāoniga mālosi ‘e lagolagoina ai lea pōlisi.

‘O le Aso Sā na folafola ai e le VaegaFa’a’upufai a le NZ First, le ‘amata fa’atapula’a o le maua ‘o le penisiona mō na’o tagata Sitiseni Niu Sila, ‘amata atu ‘i le 2029, pe ‘ā filifilia ‘e tūla’i mai le faigāmālō. Na tā’ua e le ta’ita’i ‘o le pātī Vaovasamanaia Winston Peters, ‘o sē tasi o māfua’aga ‘o lea suiga, ona ‘o popōlega ‘i le lē gafatia ‘e le atunu’u ona fa’aauau ona totogi le polokalame ‘o le Supa.

Saunoa Peters, ‘ua fa’atuputupula’ia le nūmera o tagata mātutua ‘i Niu Sila, ma ‘ua si’itia fo’i le tupe ‘e totogi ‘e tagata totogi lāfoga mō le Supa. Na fa’aalia ‘e Peters, ‘e  lē talafeagai le alu ‘o tupe ‘a le ‘au totogi lāfoga ‘e fa’atupe ai se penisiona ‘a se tagata na malaga mai ‘i Niu Sila mō se taimi pupu’u na totogi ai ana lāfoga ‘inei.  

‘O le taimi nei ‘o lo’o mafai ‘e tagata ‘e ‘ūmia le nofo mau ona maua le penisiona, peita’i, ‘e tatau ona lātou ‘ausia aiaiga ‘o le ‘umi ona nofo ‘i Niu Sila. ‘E tatau ona i le vā o le 10 i le 20 tausaga ‘e nofo ai i Niu Sila, fua ‘i lona tausaga fānau, ‘amata mai ‘i le 20 ‘o ona tausaga. ‘E aofia ai ma le 5 tausaga talu ona ‘atoa lona 50 tausaga.

Na fa’ate’ia le tama’ita’i Aukilani ‘o Sophie Liu ‘ina ua fa’alogo ‘i lea pōlisi. ‘O Liu ‘e sau mai Saina, ‘o se atunu’u ‘e lē fa’atagaina le ‘ūmiaina ‘o ni sitiseni ‘i ni atunu’u se lua. ‘E ui ua silia ma le sefulu tausaga o nofo i Niu Sila ma ua ‘ausia aiaiga ‘e mafai ai ona ‘avea ma sitiseni Niu Sila, ‘ae ‘e le’i suia lava lona tusifolau ma ‘avea ma sitiseni, ‘ona o lo’o pea lona ‘āiga ‘i Saina.

Na ia tā’ua, mō tagata ‘e malaga mai ‘i atunu’u e pei o Saina ‘e lē fa’atagaina le ‘ūmia ‘o sitiseni e lua, ‘e lē faigōfie le filifiliga ‘e ‘avea ma sitiseni Niu Sila. ‘E to’atele tagata ‘e ‘umia visa nofo mau ua fuafua ‘e fa’amautū ma litaea ‘i Niu Sila, ma ‘ua lē toe faia foi ni ā lātou saofaga ‘i polokalame penisiona ‘a atunu’u na malaga mai ai.

Link to RNZ (Article): https://www.rnz.co.nz/news/chinese_english/1308732/migrants-shocked-by-nz-first-s-superannuation-policy

IMAGE/ATA: RNZ / Yiting Lin