Taufai pa’ū le lagolago mō le National ma le Labour

Sa taufai pa’ū ‘i lalo ifo ‘o le 30 pasene le tūlaga lagolagoina ‘o le Labour fa’apea ma le National, ‘i le taunu’uga ‘o le su’esu’ega aupito lata mai nei ‘o manatu ma lagona ‘o le ‘au pālota.

‘O le pātī fou ‘o le Opportunity lea sa tūlaga lelei ‘i isi su’esu’ega talu ai nei, latou te le’i ‘ausia le lima pasene ‘e mafai ai ‘ona sao ‘i le Palemene, ‘i le su’esu’ega fou lenei ‘a le Taxpayers Union-Curia Poll. ‘E na’o le 4.5 pasene na tūlai mai ai le Opportunity Party.

‘O le Labour ‘e 1.9 pasene na pa’ū ai le tūlaga lagolagoina ma tūla’i mai ai ‘i le 25.9 pasene ‘i le taimi nei ‘a’o le National ‘e lua pasene na pa’ū ai ma tūlai mai latou ‘i le 29 pasene ‘i le taimi nei.

‘O le pātī ’a le Greens ‘e 3.8 pasene na si’itia ai le lagolagoina ‘e le ‘au palota, ma o’o ai ‘i le 13.9 pasene, ‘a’o le pātī ‘a le ACT, ‘e 3.2 pasene na fa’aopoopo ma tūla’i mai latou ‘i le 10.5 pasene.

‘O le NZ First na pa’ū le 0.7 pasene ma tūla’i mai ‘i le 8.4 pasene ‘i le taimi nei ‘a’o le pātī ‘a Māori na fa’aopoopo le ‘afa pasene ma o’o ai latou ‘i le lua pasene.

‘A fa’avasega ‘i nofoa ‘o le Palemene le tūlaga ‘o le su’esu’ega lenei, na tūla’i mai lea ‘o le Faigāmālō So’ofa’atasi ‘o lo’o iai nei, ‘a le National, ACT ma le NZ First, ‘e 64 ō latou nofoa ‘e tatau ‘ona maua, ‘a’o le Itū Āgai ‘a le Labour, Greens ma le Te Pātī Māori, ‘e 56 le aofa’i ‘o latou nofoa.

‘O le Opportunity Party, ‘e leai se nofoa.

’I le ta’ita’i ‘e tatau ‘ona ‘avea ma palemia, ‘o Tuisinavemaulomotootua Christopher Luxon, ‘e 21.2 pasene, ‘a’o Chris Hipkins ‘e 16.9 pasene.

Link to 1News (Article): https://www.1news.co.nz/2026/09/07/labour-and-national-polling-collapse-both-under-30-in-new-survey/

IMAGE/ATA: 1News