Lē malaga Ardie Savea ‘i ‘Amerika ‘ona ‘ua manu’a

‘Ua lē malaga ‘i Amerika le kapeteni ‘a le ‘Olōpeleki ‘iā Ardie Savea fa’atasi ma isi tama tā’a’alo ‘e to’alua, ‘ona ‘o ni manu’aga na a’afia ai ‘i le ta’aloga ‘i le taeao ‘o le Aso Sā ma le Springboks ‘i Soweto ‘i ‘Aferika ‘i Saute.

‘O Savea ‘o lo’o fa’alētonu lona taua’u. ‘Ae ‘o isi tama ta’alo ‘e to’alua, ‘o Quinn Tupaea ‘o le laina ‘i tua ‘o lo’o āfaina lona tulivae ma le loose forward ‘o Luke Jacobson, na manu’a lona tulilima. ‘O Jacobson lea na ‘avea ma sui kapeteni ‘ina ‘ua alu ‘i tua Ardie Savea ‘i le ‘afa muamua ‘o le ta’aloga.

Peita’i la, ‘o lea ‘ua fa’ailoa mai ‘e to’aono isi tama tā’a’alo ‘o le ‘au ‘o le ‘a toe fo’i mai ‘i Niu Sila ‘e lē ō fo’i ‘i ‘Amerika, ‘ona ‘o manu’aga na a’afia ai mai isi ta’aloga ‘o le ta’amilosaga.

O Baltimore ‘i ‘Amerika, lea ‘o le ‘a faia ai le ta’aloga faitauina lona fā ‘i le vā ‘o ‘au ‘e lua ma tauāluga ai le ta’amilosaga ‘a le All Blacks pei ‘ona ‘amatalia ai ‘i ‘Aferika ‘i Saute.

‘O lea ‘ua lua mālō ‘o le Springboks ‘ae tasi Niu Sila ‘i ta’aloga faitauina ‘e tolu ‘ua ‘uma, ‘ae ‘o le ta’aloga lea ‘i Baltimore, ‘o le ‘a iloa ai pe tutusa ‘e ta’ilua mālō, po’o le mālō aia’i ai ‘o le Springboks ‘i le series.

‘O le ta’aloga ‘i le taeao ‘o le Aso Sā, ‘e ta’i 4 sikoa na maua ‘a ‘au ‘e lua, ‘ae na mālō ‘Aferika ‘i Saute ‘i ‘ai ‘e 29 ‘i le 24 ‘a le All Blacks.

IMAGE/ATA: All Blacks Facebook