Maua ‘i Uēligitone ni QR Codes pepelo ‘i masini totogi ai paka o ta’avale ‘i Uēligitone

‘Ua maua ‘i Uēligitone ni QR Codes pepelo o lo’o fa’apipi’i ‘i masini e totogi ai paka a ta’avale, ma ‘ua lapata’ia ‘e leoleo tagata lautele ‘ina ‘ia mataala ‘i ia faiga taufa’asesē.

Na tā’ua e le pūlēgānu’u a Uēligitone, ‘ua ‘ave’ese ‘e le ‘aufaigāluega ia ‘e va’aia paka le tusa ma le 12 ‘o pepa o lo’o ‘iai QR Codes pepelo, mai ‘i vāega ‘ese’ese o le ‘a’ai. ‘O ia pepa ‘a scan ‘e se tagata ‘i lana telefoni, ‘e ‘ave ai ‘i se ‘upega tafa’ilagi ‘e fesiligia ai ni fa’amatalaga ‘e pei o le ‘umi ona paka le ta’avale, ma le nūmera ‘o le laisene o le ta’avale, ona talosagaina lea ‘o fa’amatalaga ‘o le Credit card.

‘Iā Iūlai na lapata’ia ai fo’i e le Pūlēgānu’u ‘a Kalaiesetete tagata lautele ‘i se faiga taufa’asesē fa’apēnei, ‘ina ua maua ni QR Codes pepelo ‘i nisi o masini totogi paka ‘a le pūlēgānu’u ma pisinisi tūma’oti. Na tā’ua ‘e leoleo i Uēligitone ‘i luga o ‘upega tafa’ilagi ‘i le Aso Tofi, ua lātou maua ni fa’aseā ‘e uiga ‘i ia faiga taufa’asesē, ma lapata’ia tagata ‘ina ‘ia ‘aua ne’i talitonu ‘iai, ona ‘e fa’afōliga ‘o ni QR Codes moni.

Link to RNZ (Article): https://www.rnz.co.nz/news/crime-and-justice/1244803/fake-parking-qr-codes-discovered-in-wellington

IMAGE/ATA: Supplied (RNZ).