Saunoa le pulenu’u, tele vāega ‘o le līpoti ‘a le Deloittle na tusi ‘e le AI

Na saunoa le pulenu’u ‘o Uēligitone, Andrew Little ‘i se talanoaga ‘i le leitiō, ‘e telē se vāega ‘o le līpoti ‘a le Deloitte ‘e fa’atatau ‘i le tūlaga ‘o le ‘aufaigāluega ‘a le pūlēgānu’u na tusi ‘e le AI po’o le poto fa’afōliga ‘o masini komipiuta, ‘ae $435,000 le tau mō le faiga ‘o le līpoti.

Na fa’alauiloaina ‘i le māsina ‘o Nōvema ‘i le tausaga talu ai, le līpoti ‘o le Future Fit Pōneke, lea na tā’ua ai, ‘330 ‘ua ‘ova ai le to’atele ‘o le ‘aufaigāluega ‘a le pūlēgānu’u peita’i, mulimuli ane, na faitau fa’alua le nūmera ‘o tagata faigāluega ‘o lo’o iai ‘i le taimi nei fa’atasi ai ma avanoa faigāluega ‘e le’o iai nisi ‘o gālulue ai ma sā fa’alagolago ‘i fa’amaumauga ‘o gāluega ‘ua tolu le tausaga le matua, mai le Iuni ‘a le Taxpayers. 

Na saunoa Little ‘i se talanoaga ‘i le Aso Lua ‘i le Newstalk ZB, ‘e telē se vāega ‘o le līpoti na tūsia ‘e le AI peita’i ‘e le’i fa’ailoaina po’o ā vāega ‘o le līpoti na tūsia ‘e le AI.

Na fa’asino ‘e le ‘ōfisa ‘o Little se talosaga ‘a le Local Democracy Reporting mō se fa’amatalaga, ‘i se pepa na tu’uina atu ‘i se fonotaga ‘a le pūlēgānu’u ‘i le vaiaso talu ai. ‘O lea pepa na fa’amatala ai nisi ‘o sesē fa’aopoopo na maua ‘i totonu ‘o le līpoti.

‘E aofia ai le vāega na faitauina ai ‘e Deloitte tagata faigāluega ‘uma ‘e pei ‘e faigāluega tūmau ma maua totogi ‘ātoa, ‘e tusa lava pē ‘ese’ese ītūlā na lātou faigāluega ai. Na ‘ova fo’i ‘i le $21.5 miliona le tupe ‘e fa’apea na fa’aaluina ‘i le ‘aufaigāluega. 

Na fesiligiaina le Deloitte mō so lātou finagalo ‘e uiga ‘i le fa’atalanoaga ‘a Little ‘i le Aso Lua, peita’i sā tūtūmau lava ‘ona lagolago ‘e le kamupanī la lātou līpoti ‘i se taimi muamua atu.

Link to RNZ (Article): https://www.rnz.co.nz/news/regions/1229348/mayor-says-large-chunks-of-wellington-council-deloitte-report-written-by-ai

IMAGE/ATA: Screenshot / Andrew Litle Facebook Video