Gau le $242 miliona ‘a le Air New Zealand

‘E $242 miliona le gau fa’aletausaga ‘ua fa’amauina ‘a le kamupanī va’alele ‘a le Air New Zealand, ‘ona ‘o le taugatā ‘o suāu’u va’alele ‘ātoa ma fa’afītāuli ‘i afi ‘o lo’o fa’aaogāina ‘e va’alele ‘o le kamupanī.

‘O ia fa’alētonu ‘ua fa’alētonu ai tupe maua ‘a le kamupanī, ‘e ui ‘ina sā lelei le tūlaga ‘o ana tupe maua mai pāsese ‘o tagata femalāga’i.

‘O fa’amaumauga ‘autū mō le 12 māsina lea na fa’a’uma ‘i le aso 30 ‘o Iuni ‘o le tausaga nei, 2026, fa’atusa ‘i le tausaga talu ai:

‘O le gau sā fa’amauina mō le tausaga ‘e $242 miliona, ‘e fa’atusa lea ‘i le polōfiti po’o le tupe mamā ‘e $108 miliona ‘i le tausaga talu ai.

• ‘O le aofa’iga ‘o tupe maua sā fa’amauina ‘e $7 piliona, fa’atusa lea ‘i le $6.8 pilioina sā iai.
• ‘O le gau ‘e $336 miliona ‘a’o le’i totōgia lāfoga mō le tausaga na mavae atu nei, ‘e fa’atusa lea ‘i le polōfiti ‘e $164 miliona ‘a’o le’i totōgia lāfoga ‘i le tausaga ‘ua mavae.
• ‘O tupe maua mai le totogi ‘o pāsese ‘o tagata malaga na o’o ‘i le $6.1 piliona, fa’atusa lea ‘i le $5.9 piliona lea sā iai ‘i le tausaga talu ai.

Sā fa’amamafaina mai ‘i le līpoti fa’aletausaga ‘a le Air New Zealand, le si’itia lea ‘i le 11.8 pasene ‘o le tau ‘o le fa’afoeina ‘o ana gāluega, lea ‘e aupito maualuga ai le tau ‘o suāu’u mō va’alele, soso’o atu ai ma le tau ‘o le tausiga ‘o va’alele ‘aemaise ‘o masini tau feso’ota’iga ma femālāgā’iga ‘o va’alele, peita’i sā mātauina le si’itia ‘o tupe maua mai pāsese ‘ātoa ai ma le totogi ‘o uta fela’ua’i ‘i le tausaga fa’aletupe na se’i mavae atu nei.

Sā fa’ailoa mai ‘e le ali’i pule ‘o Nikhil Ravishankar, ‘o se tausaga faigatā lenei mō le tele ‘o kamupani va’alele ‘a le lalolagi, ‘ona ‘o le taugatā ‘o suāu’u ‘e māfua mai le taua ‘i Sasa’e Tūtotonu.

Link to RNZ (Article): https://www.rnz.co.nz/news/business/1159418/air-new-zealand-plunges-to-242-million-loss-as-fuel-and-engine-costs-bite

IMAGE/ATA: Supplied / Air New Zealand (RNZ).