Fonotaga lona 15 ‘a le Mafutaga ‘a Tinā ma Tama’ita’i Metotisi o le lalolagi

‘O le vaiaso nei ‘o lo’o fa’agāsolo ai le fonotaga ‘a le Mafutaga ‘a Tinā ma Tama’ita’i Metotisi o le Lalolagi po’o le World Federation of Methodist & Uniting Church Women. ‘O le lona 15 lea ‘o fonotaga, lea ‘o lo’o talimālō ai le South Pacific Area ‘i lalo o le Iunite ‘a Niu Sila ma o lo’o faia lea ‘i le Due Drops Centre i Manukau i Aukilani.

‘O le 2016 sa talimālō ai Houston i Texas i Amerika. ‘O le 2021 sa fa’ataunu’uina ai i luga o upega tafa’ilagi ona ‘o le Koviti, a’o lea ua maua le avanoa ‘e mafai ai ona toe fa’atasitasi talu mai le 5 tausaga talu ai. ‘E ta’i 5 tausaga ma fa’ataunu’uina lenei mafutaga ‘i so’o se atunu’u ‘e filifilia.

‘E pē ā ma le 3.8 miliona tinā ma tama’ita’i o le lalolagi mai atunu’u ‘e 91 o lo’o resitala ‘i lenei mafutaga ma ‘e 9 vāega o le kelope, ‘o lo’o vaevae ‘iai units ‘e 75. ‘O le South Pacific Area o lo’o aofia ai iunite ‘o le Pasefika ‘e pei o Niu Sila, Fiti, Sāmoa, Papua Niu Kini, Solomona ma Toga. ‘O isi ‘eria ‘e aofia ai le atu Europa, Aferika, Asia ma Amerika.

‘E ‘ova atu ma le 600 tinā ma tama’ita’i Metotisi ma le lotu so’ofa’atasi ‘o le lalolagi o lo’o ‘auai mai ‘i lenei fonotaga, ‘O lo’o ‘auai fo’i mai ai fo’i le Peresetene Sili ‘o le ‘Auso Fealofani a le ‘Ekalesia Metotisi Sāmoa, le faletua iā Fialelei Faulalo Leti ma lona ofisa mamalu ‘e fai ma sui ‘o le Iunite ‘o Sāmoa.

‘O le ‘autū ‘o lenei tausaga ‘o le “Arise and Shine for the glory of God is upon you”. ‘O se fa’amālosi’au lava i tinā ma tama’ita’i o le lalolagi i le tāua ‘o le lātou vala’auina ‘i totonu o ‘āiga, nu’u ma Ekalesia. ‘O lenei fo’i mafutaga o lo’o lagolagoina se polokalame mō tama’ita’i lāiti, o lo’o fa’aigoaina ‘o le Helen Kims Scholarship. ‘O lenei polokalame ‘e filifili mai ai tama’ita’i ‘e to’alua mai ‘i vāega ‘e 9, ‘o le tama’ita’i pito i la’ititi ‘e 18 tausaga mai Brazil.

‘O nisi o polokalame mō lenei vaiaso ‘e aofia ai workshops, fa’afiafiaga, ‘o malaga ta’amilo, ma fa’afofoga ai ‘i līpoti mai i atunu’u ‘ese’ese. ‘O le afiafi o le Aso Tofi sa fa’ataunu’uina ai le pālota mō le nofoa’iga fou po’o le World Officers mō le isi 5 tausaga. Ma ua tūla’i mai le sui o Aielani ‘o Louise Wilson ‘e ‘avea ma Peresetene. ‘O le Sui Peresetene ‘o Patricia Petudzal Mapani mai Zimbabwe. ‘O le teutupe ‘o le tama’ita’i Amerika ‘o Jeanette Bockright, ma le failautusi ‘o le sui o le Pasefika ‘o Simulata Pope. ‘O lea fo’i tama’ita’i talavou ‘o le konevina po’o le fa’auluuluga ‘o le Local Arrangements Committee lea ‘o lo’o gafa ma le tāpenaga ‘o lea fono tele. ‘E fa’amāe’aina lenei mafutaga ‘i le Aso To’anai nei. 

Report provided by Esther Tafa

IMAGE/ATA: WFMUCW