Fa’ateleina nūmera ‘o tagata nonō tupe mō ā’oga fa’atasi ma le tupe aofa’i

‘Ua si’itia maualuga le nūmera ‘o tagata ‘e fa’aaogāina le polokalame ‘o nonōgātupe mō tamaiti ā’oga (student loan scheme) fa’apēnā ai ma le aofa’iga ‘o le tupe nonō.  Na līpoti atu le Matāgāluega ‘o Ā’oga ‘i le Minisitā mō A’oa’oga Maualuluga ‘e iai Iunivesitē ma Matātā ‘ese’ese, Penny Simmonds, ‘e 126,696 le aofa’iga ‘o tagata na nonō tupe mai lea polokalame ‘i māsina muamua ‘e tolu ‘o le tausaga, mā ‘e 12 pasene ‘ua maualuga atu ai nai lō le kuata muamua, o le tausaga talu ai.

‘E tusa ma le $1.145 piliona, le aofa’iga ‘o le tupe nonō, ma ‘e 19 pasene po’o le $184 miliona ‘ua sili atu ai nai lō le piliota lava lea ‘e tasi ‘i le tausaga ‘e 2025.  13 pasene na si’itia ai le nūmera ‘o tamaiti na fai nonōgātupe mō lātou pili, ‘ae 11 ma le 10 pasene na si’itia ai le nūmera ‘o ē na nonō tupe mō tau ‘o matā’upu ma le fa’atupega ‘o mea ‘e tausi ai ‘i lātou. 

Na tā’ua ‘i le līpoti, ‘e pei ‘o le tausaga ‘e 2024, lea na fa’asolosolo fa’atuputupula’ia ai le nūmera ‘o tagata ‘e fai nonōgātupe mai le polokalame ‘o le student loan scheme.

Na tā’ua ‘i le līpoti, ‘o le nūmera ‘o tagata na nonō tupe ‘ua te’a le taimi ‘e totogi ai, ‘e fa’apea ‘e 4 pasene na pa’ū ai fa’atusatusa ‘i le piliota lava ‘e tasi ‘i le tausaga talu ai, ma ‘o le 75 pasene, ‘e aumau ‘i atunu’u ‘i fafo.  ‘E o’o mai ‘i le aso 31 Mati, ‘ua ‘i le $2.7 piliona le tupe aofa’i ‘o ‘aitālafu ‘ua te’a le taimi ‘e totogi ai.  ‘E i luga atu ‘o le 46 pasene po’o le $1.2 piliona ‘o le ‘aitālafu aofa’i, ‘o fa’asalaga ma tului, ma le $1.1 piliona ‘o ia fa’asalaga, ‘o tagata ‘o lo’o aumau ‘i atunu’u ‘i fafo.  Na tā’ua ‘i le līpoti, ‘e 37,500 tagata na maua a lātou ‘alauni, 8 pasene ‘ua maualuga atu ai nai lō le tausaga talu ai ‘e tusa ai ma līpoti ‘a le Leitiō Niu Sila.

Link to RNZ (Article): https://www.rnz.co.nz/news/education/1109828/student-loan-borrower-number-climbs-along-with-amount-loaned

IMAGE/ATA: Tri Wiranto/Unsplash – RNZ