‘O le ‘ā lē fīlēmū le faiā’oga ‘o le Springboks

‘E ‘ioe le faiā’oga ‘o le ‘au ‘a le Springboks le ali’i ‘o Rassie Erasmus, sā fai si tīgāina ‘o lana ‘au ‘i le ta’aloga faitauina muamua ma le ‘Olopeleki, ‘i le malae ‘o le Ellis Park ‘i le ‘a’ai ‘o Johannesburg ‘i le taeao ‘o le Aso Sā.

‘E pei ‘ona silasila ma maimoa ‘i ai ‘i lea ta’aloga, ‘e lima sikoa ‘a le All Blacks ‘i le tasi ‘o le sikoa ‘a ‘Aferika ‘i Saute ma sala ‘e lua, ia na maua ai o lātou ‘ai ‘e 16 ‘i le 33 ‘a Niu Sila.

Sā fa’aalia ai ‘e Erasmus ‘i le feiloa’iga ma le ‘au fa’asalalau ‘ina ‘ua ‘uma le ta’aloga, ‘o le ‘ā tatau ‘ona su’e se faiga ma se ‘auala ‘e mālō ai le Springboks ‘i le ‘Olopeleki.  Sā ia ta’utino fo’i, ‘o le ‘ā lē faitau ‘i se nusipepa ma nisi fa’asalalauga ma tusitusiga ‘e tusa ‘o le ta’aloga ‘i le Aso Sā mā ‘o le ‘ā ia taumafai fo’i ‘e tāofi le faia ‘o nisi fa’amatalaga ‘e tusa ‘o le ta’aloga ma tāpenaga ‘a lana ‘au,  ‘ae ‘o le ‘ā taumafai mālosi, ‘ina ‘ia mālō ‘i lātou ‘i le ta’aloga lea ‘e soso’o ai ‘i le fa’ai’uga ‘o le vāiaso nei, ‘ae fa’apea ma isi ta’aloga faitauina ‘uma ‘o lo’o totoe, ‘i le vā ‘o ‘au ‘e lua.

‘E pei ‘ona silafia, ‘e fā ta’aloga faitauina ‘o le ta’amilosaga lenei ‘a le ‘Olopeleki ‘i ‘Aferika ‘i Saute lea ‘ua mālō ‘i le ta’aloga muamua ‘ae toe tolu ia ‘o lo’o totoe nei.

IMAGE/ATA: Springboks Facebook