Ūna’ia polokalame fa’aleagaga ‘i totonu ‘o le to’ese

‘Ua fa’ailoa ‘e le sui ‘o le Matāgaluega ‘o Leoleo le iai ‘o le tāua ‘o nisi ‘o polokalame fa’aleagaga, ‘o lo’o fa’atautaia ‘e nisi ‘o ‘ekālēsia ‘i totonu ‘o le to’ese.‘Ua fa’amauina nisi ‘ua tu’ua lenei nofoaga, ‘ae ‘ua fa’aauau lava ‘ona āga’i ‘i nisi ‘o ā’oga fa’a tusi pa’ia, ma ‘ua ‘avea lea ‘o se ‘ai ‘o polokalame ‘o lo’o fa’atino nei ‘i totonu ‘o le to’ese. ‘E le gata ‘i lea, ‘o le a’oa’oina ai fo’i ‘o nisi ‘o matātā ‘ese’ese ‘e sa’ilia ai se lumana’i mo ‘i lātou, pe ‘a fai ‘ae toe fo’i atu ‘i ‘āiga.

Fa’aalia ‘e le sui ‘o le matāgaluega ‘i le TV1, “E tele polokalame ‘ua āga’i atu, [‘ua] mātou va’aia fo’i [le] fiafia ‘o tagata ‘e āga’i ‘i nei polokalame … ‘ua iai fo’i nisi ‘ua fo’i mai ‘i tua ma le to’ese, ‘ua āga’i ‘i bible studies ‘e pei ‘o le RHEMA … ma ‘o lo’o iai fo’i ma le ‘au’aunaga ‘a le EFKS”.

‘O le fa’alauiloa fa’aauau ‘a le Matāgaluega ‘o Leoleo ‘i le tete’e atu lea ‘i fuālā’au fa’asāina, ‘e tapena ai ‘autū ‘o māsina ta’itasi ‘e lima ta’ita’iina ai fuafuaga ma galuega fa’atino, ‘ina ‘ia ‘ausia lava le manulautī ‘o lo’o tulituli ‘e le polokalame. ‘Ua fa’aigoaina ai le māsina lenei ‘o Iūlai, ‘o le Ta’ita’iina ‘e le Agaga, ‘e pi’iama atu ‘i le fa’amoemoe ‘o le usugāfono ‘a le ‘ekālēsia Metotisi ‘o lo’o usuia ‘i lenei māsina.

IMAGE/ATA: SCR / Murray Faivalu