‘Ua tu’umālō le Tōfā Tolofua’ivalelei Falemoe Leiʻataua, Fofoga Fetalai lona 11 ‘o le Fono Aoao Faitūlāfono ‘a Sāmoa

‘Ua fa’amānavaina ‘e le Atua le soifua tautua ‘o se tasi ‘o toa manumanu ‘o le Fono Aoao Faitūlāfono ‘a Sāmoa ma ona ‘upufai ‘i le tele ‘o tausaga ‘ua mavae, le Tōfā Tolofua’ivālelei Falemoe Leiʻataua.

‘O le Tōfā Tolofua‘ivalelei, sa ‘avea ma Sui Faipule mō le Itūmālō ‘o A‘ana Alofi No. 2, ma sa tautua ‘i le Palemene mai le 1996 se‘ia o’o ‘i le 2016 ‘i le vāegafa’a’upufai ‘a le H.R.P.P. ‘I le tausaga ‘e 2001, sa ‘avea ai ‘o ia ma Sui Fofoga Fetalai, ‘ae mulimuli ane filifilia ‘e ‘avea ma Fofoga Fetalai lona 11 ‘o le Palemene, mai le aso 22 ‘o ‘Aperila 2006 se‘ia o’o ‘i le aso 18 Mati 2011.

‘O lana tautua ‘i le mālō sa aofia ai fo‘i le tofiga ‘o le Minisita ‘o Tinā ma Tama’ita’i, Atina‘e o Nu’u ma Afio‘aga fa’apea Agafeso’ota’i ‘a le Mālō, lea sa ia tau’aveina mai le 2011 se‘ia o’o ‘i le 2016. Sa muamua fo‘i ‘ona ‘avea ‘o ia ma Minisita ‘o le Falemeli ‘a le atunu’u ma Feso‘ota‘iga ‘i le 1996.

IMAGE/ATA: SCR