‘Ua toe ‘ātoa nofoa ‘o le Kapeneta, 4 Minisita fou ‘ua fa’atautōina

‘Ua toe ‘ātoa nofoa ‘o le Kapeneta, ma lana ‘auva’a ‘ina ‘ua fa’atautōina ‘i le taeao ‘o le Aso Lulu 15 ‘o Ianuari 2025, Minisita fou ‘e to’afā, ‘e suitūlaga ‘i nisi ‘o Minisita ‘ua fa’amutaina ō latou tofiga.

‘I se sauniga na fa’atautaia ‘i le Maota ‘o lana Afioga ‘i le Ao Mamalu ‘o le Mālō Tuimaleali’ifano Va’aletoa Sualauvi II, na saunoa fa’asilasila ai ‘e le Afioga ‘i le Tama’ita’i Pālemia Hon. Fiame Naomi Matā’afa, le filifilia ai ‘o:

Le Afioga ‘iā Faleomavaega Titimaea Tafua ma Minisita ‘o Pisinisi, Alamanuia ma Leipa.

‘O le Afioga ‘iā Laga’aia Tiaituau Tufuga ma Minisita ‘o Tina ma Tamaitai, Atiinae ‘o Nu’u ma Agafeso’ota’i.

‘O le Afioga ‘iā Mau’u Siaosi Pu’epu’emai ma Minisita ‘o Feso’otaiga ma Fa’amatalaga Tekonolosi fa’apea;

le Afioga ‘iā Niuava Eti Malolo ma Minisita ‘o Fa’atoaga ma Faigafaiva & Fa’alapotopotoga ‘o Su’esu’ega Fa’asaienisi.

‘Ua māe’a fa’atautōina ‘uma ‘i latou, ma ‘ua fa’amaonia ‘e le Ao Mamalu ‘o le Mālō.

ATA: Full Cabinet Photo (Screnshot), individual members (Samoa Observer)