Tu’ua ‘e le Pālemia le atunu’u mō Peretānia Tele ‘auā ona tiute fa’a-Ta’ita’ifono ‘o le Taupulega (CHOGM)

Ua tu’ua e le afioga i le Palemia o Samoa iā Fiame Naomi Mataafa le atunu’u mo Peretania Tele, auā le fa’atinoga o ona tiute fa’a-Ta’ita’ifono o le Fa’alapotopotoga o Mālō o le Taupulega [C.H.O.G.M.].

Mo le silafia, o le talimālō ai o Samoa iā Oketopa o le tausaga ua mavae i le Fonotaga Tele o le C.H.O.G.M. na fa’ase’e mai ai i le afioga i le Palemia o Samoa le tofiga Ta’ita’ifono mo lea Fa’alapotopotoga i le umi e lua tausaga se’ia toe suia pe ā usuia le isi Fonotaga Tele a le C.H.O.G.M. i totonu o Antigua ma Barbuda i le tausaga fou 2026.

Fa’ailoa e Fiame i le feiloā’iga ma Tusitala ma le Aufa’asalalau, o le malaga ai i lea fa’amoemoe fa’alemālō, o le fa’atinoina ai lea o ona tiute fa’a-Ta’ita’ifono mo le C.H.O.G.M. i lona Ofisa Autū i Peretania Tele.

E tasi le vaiaso o lenei faigāmalaga, ma o lo’o malaga fa’atasi le Ta’ita’i o le Mālō, o le Ofisa Sili o le Matāgaluega o le Va i Fafo iā Pesetā Noumea Simi, fa’apea nisi o le aufaigaluega a le Mālō.

O le tatalo a le afioga i le Palemia, ina ia manatua pea i talosaga ma anapogi, lana faigāmalaga ma nisi o le aufaigaluega a le Mālō, auā le tu’uina o se sao o Samoa mo lenei Fa’alapotopotoga tele i le lalolagi.

Release written by Pesetā Tusiga Taofiga (Savali Newspaper)

ATA: SCR (file).