Tolopō le malaga ta’amilo ‘a le Manu Samoa ‘i ‘Europa

‘E tusa ai ma līpoti ‘a le Leitiō Niu Sila, ‘ua fa’ata’atia ‘ese le fuafuaga ‘a le Manu Samoa, ‘e malaga ta’amilo ai ‘i le atu ‘Europa ‘ona ‘o le tele ‘o lu’itau ‘o feagai ai ma tūlaga tau tupe, ma ‘ua faia fo’i lea fuafuaga, ‘ina ‘ia ‘aua ne’i o’o atu ‘i se tūlaga māasiasi ‘o le ono gau ‘o le iuni. 

‘I se tusi ‘o le Aso 11 Iulai 2024 pei ‘ona fa’ailoa ‘i luga ‘o le ‘upegatafā’ilagi ‘a le RNZ Pacific, na tusi atu ai le ta’ita’ifono ‘o le Lakapī Sāmoa, Susuga Dr. Tuila’epa Sa’ilele Malielegaoi ‘i le ta’ita’ifono ‘o le Lakapī ‘a le Lalolagi, To’oto’otūmua Sir Bill Beaumont, ‘o lea fa’ai’uga, ‘o se tali tu’usa’o lea ‘i le ogaoga tele ‘o lu’itau ‘o feagai ma le Lakapī Sāmoa ‘i tūlaga tau tupe.  ‘E tūmau pea le tāumauga ‘o le fa’alāpotopotoga ‘ina ‘ia tauvā Sāmoa ‘i le fa’atumutumuga ‘o le fā’āgātama ‘o le lakapī.  Sa taumafai mālosi pea le Lakapī Sāmoa ‘e mulimuli ‘i fa’atinoga ‘o pūlega lelei, peita’i ‘o le lē lava ‘o le lagolago ‘i tūlaga tau tupe, ‘ua fa’avaetu’ia ai a lātou taumafaiga pei ‘ona tā’ua ‘i le tusi.  ‘O le lē lava ‘o le lagolago (sponsorships) ‘i tamāo’āiga lāiti, ‘o se lu’itau pito sili lea ‘ona telē, ‘o lo’o āfāina ai a lātou taumafaiga ‘i le fa’atāolaolaga ma le fa’aauauga ‘o le tā’aloga lakapī.  ‘O lo’o aofia ‘i le tusi, se tāumauga ‘o le Lakapī Sāmoa, ‘e gālulue vāvālalata ai ma le Lakapī ‘a le Lalolagi, ‘e ātina’e ni faiga ma ni fuafuaga ‘e fa’amautinoa ‘e mafai ‘ona fa’aauau ma fa’atāolaola pea le lakapī ‘a Sāmoa, pei ‘ona tā’ua ‘i līpoti ‘a le Leitiō Niu Sila. 

Link to RNZ (Article) translated by Savelina Kasiano: https://www.rnz.co.nz/international/pacific-news/524346/samoa-rugby-facing-significant-financial-challenges-withdraws-from-europe-tour

ATA: Sāmoa Capital Radio (file)