Tofiga ‘a le Kapeneta mō nisi ‘o Fa’auluuluga ‘o Matāgaluega

‘E lua tōfiga ‘o pulega po’o fa’auluuluga ‘o matāgaluega ‘a le mālō ‘ua pāsia ‘e le fono ‘a le palemene ‘i lenei vaiaso, ‘e aofia ai le fa’auluuluga ‘o le pulega ‘o fa’alāpotopotoga ‘o fale ‘a Sāmoa, lea ‘ua toe filifilia ai ‘e le Kapeneta le Afioga Sautiamaivasa Titimaea Tiotio, ‘e toe fa’aauau lana tautua mo leisi tolu tausaga.

‘O Sautiamaivasa na amata mai lana tautua ‘i le 2023, lea sā sē’ei ‘i ona tōfiga ‘o le ‘Ōfisa Sili lagolago, ‘i le fa’alāpotopotoga na ‘amata mai ‘i le 2020. ‘Ae ‘o lana tautua na ‘amata mai ‘i le tausaga 1999, ma ‘ua lata atu ‘i le 30 tausaga ‘o lana tautua. ‘O le iai pea ‘o le fa’atuatuaga ma le talitonuga ‘o le faigāmālō, ‘o lo’o sōloga manuia lana tautua mai le fa’alāpotopotoga, ‘ua toe ‘autasi ai le Kapeneta ‘e toe fa’aauauina mo leisi tolu tausaga.

‘E fa’apea fo’i ‘i le susuga Tāfesilafa’i Ipuniu Filipo lea fo’i ‘ua toe fa’aauau lana ‘au’aunaga fa’a ‘Ōfisa Sili mo le pūlega ‘o ‘au’aunaga va’a ‘a Sāmoa. ‘O le tausaga fo’i ‘e 2023 na ‘amata tōfia ‘e fa’auluulu ‘iai le fa’alāpotopotoga va’a ‘a le atunu’u mai le 4 tausaga muamua na sē’ei ai ‘i le tōfiga ‘Ōfisa Sili lagolago ‘a le pūlega. ‘O Tāfesilafa’i ‘o lo’o ia ‘ūmia nisi ‘o fa’ailoga maualuluga, ‘e iai le tikerī ‘o fa’atufugaga ‘i le itū tau tamao’āiga ‘i le 2026 mai Iunivesitē ‘o le Pasefika ‘i Saute ‘i Fiti, ma ‘o se tamāli’i ‘ua lava le tomai ma agava’a ‘e tautuaina ai le mālō ma le atunu’u ‘e tauala ‘i le ‘au’aunaga va’a ‘a Sāmoa.

IMAGE/ATA: Government of Samoa