Toe taliu ‘i Sāmoa Leiataualesa Jerry Brunt – sōloia le poloā’iga na taofia ai ‘o ia – sāuni lana talosaga mō se fa’ato’esega aloā’ia fa’apea se tagi
‘Ua toe taliu ‘i Sāmoa le faigāmalaga ‘a le Afioga ‘iā Leiataualesa Jerry Brunt ‘ina ‘ua sōloia le poloā’iga na taofia ai ‘o ia ‘i Honiara ‘i le taeao ‘o le Aso Gafua.
‘I nisi ‘o ripoti mai ‘a le Sāmoa Observer ‘o lo’o fa’ailoa ai – na tu’ua ‘e Leiataualesa Honiara ‘i le aoāuli nei, ma ‘o lo’o malaga atu ‘i Brisbane, ‘ona ui atu lea ‘i Aukilani ‘auā le toe malaga atu ai ‘i Sāmoa.
Na fa’aalia ‘e Leiataualesa ‘i le ‘au’aunaga ‘a le Sāmoa Global News, “e’ le’i mōlia ‘o ia ‘i ni soligātūlāfono, mā ‘e leai fo’i se fa’avae fa’alētūlāfono ‘e tu’uina atu ai ‘e le Mālō Solomona se poloā’iga ‘e fa’asā ai ‘ona malaga ‘ese atu.”
Na ia fa’ailoa fo’i, ‘a fa’aolatia le faigāmalaga ‘i le atunu’u – ‘ua ia sāuni ‘e tu’uina atu se talosaga mō se fa’ato’esega aloā’ia fa’apea ai ma lana tagi ‘e fa’asaga ‘i ē na tu’ua’ia sesēina ‘o ia, ‘aemaise ‘ua fa’aleagaina lona igoa, ma ‘ua a’afia atu ai ma lona ‘āiga.
References in Article:
- Samoa Observer: https://shorturl.at/I6oKD
- Samoa Global News: https://shorturl.at/Xhf9I
ATA: Samoa Observer.