Toe fa’atalanoa le matā’upu ‘o le vaetama ‘o fanau mai Sāmoa ‘i Niu Sila

‘Ua talimālō le Afioga ‘i le Minisitā ‘o Fa’amasinoga ma lana matāgaluega, le Afioga Fesola’i ‘Āpulu Tusi’upu Tuigamala ‘i le ‘aumalaga mai Niu Sila ‘o lo’o ‘i le atunu’u ‘e fa’atautaia se fonotaga mo le 3 aso. ‘O le ‘auga ‘o lea fonotaga, ‘ina ‘ia toe silasila ‘i tūlāfono ma ta’iala saogalēmū mo le vaetamaina atu ‘o alo ma fānau mai le tātou atunu’u ‘i Niu Sila.

Pei ‘ona silafia ‘i le 2 tausaga talu ai, na taofia lē tūmau ai le toe fa’aauauina ‘o se tasi lenei ‘o vāega ‘o le faigā pā’aga ‘a Sāmoa ma Niu Sila, lea ‘ua tele alo ma fānau ‘ua manuia ai. Peita’i ‘ona ‘o le tele ‘o nisi ‘o fa’afītāuli na alia’e mai ma a’afia ai ō tātou tagata Sāmoa na lātou vaetamaina atu alo ma fānau mai lo tātou atunu’u, na āfua ai ‘ona toe silasila le vāega ‘o le Vā ’i Fafo ‘a le mālō ‘o Niu Sila, ‘ina ‘ia faia ni fofō ‘o le fa’afītāuli lenei.

‘O le va’ai mamao, ‘ia saogalēmū le ola ‘o fānau, ‘e lē gata ‘o Sāmoa, ‘ae fa’apea fo’i isi atunu’u ‘o le pasefika ‘o lo’o fa’aui atu fo’i a lātou alo ma fānau, ‘e sa’ili manuia ‘i a’oa’oga ‘i atunu’u ‘i fafo ‘i lalo ‘o le polokalame lenei ‘a Niu Sila.

IMAGE/ATA: Government of Sāmoa