Tau’a’ao ‘e ‘Ausetālia ma le UNICEF Ta’avale Fou Kiliva Tui Puipui mā Vailā’au

O le Aso Tofi, 26 Sētema 2024 na taulimaina ai e le Matāgaluega o le Soifua Mālōlōina le Loli Fou Fa’apitoa e kilivaina ai Tui Puipui fa’apea ma Vailā’au mo togafitiga i Falema’i ‘ese’ese i totonu o le atunu’u.

O se fiafiaga sili lea i le Mālō, ina ua agalelei le Mālō o Ausetalia i le Faigāpa’aga ma le Fa’alapotopotoga Fa’avāomālō a le UNICEF, e ala i lea foa’i tāua, ina ia mautinoa e malu ma ‘aua ne’i maumau se vailā’au po’o ni tui puipui fo’i a’o le’i fa’aāogaina i tagata lautele.

O le tāua o lenei Ta’avale Fa’apitoa Fou, o le ā mautinoa ai le fa’atumauina o le lelei o vailā’au ma tui puipui i lona malosi fa’atulagaina, mo le kilivaina atu i so’o se Falema’i Fa’aitumālō fa’apea nu’u i tua mo le faia o tui puipui mo tagata uma aemaise o fanauiti.

Fa’ailoa le agaga fa’afetai o le afioga i le Minisitā o le Matāgaluega iā Valasi Luapitoifanua To’ogamaga Tafito Selesele, ona o lenei foa’i tāua tele.

O le āoga o lenei fesoasoani, o le ā matuā o’oo’o atu ai le fa’atinoga o le auaunaga tau tui puipui mo fanau uma i le taulaga ma nu’u i tua fa’apea Savai’i, ma tu’uitiitia ai le numera o i latou e le’i faia le tele o tui puipui mana’omia mai le lāiti se’ia o’o ina mātutua.

O so’o se itu’āiga tui puipui, o le ā feagai lea ma lea auaunaga, ma e fuafua lava e le Matāgaluega taimi e fa’agasolo ai tuiga ta’itasi, ma le naunauta’iga ina ia ausia le 90% o Samoa atoa, ua faia o latou tui puipui mai so’o se tui puipui o lo’o mana’omia pea i le taimi nei ona fa’amae’a.

Saunoa le Minisitā, e ao i le Matāgaluega ona matuā una’i le fa’aāoga tatau o lenei auaunaga tāua, ma ia mautinoa e teu malu tui puipui ma vailā’au i lenei ta’avale fa’apitoa ina ia ‘aua ne’i maumau i se taimi.

Fa’ailoa Khin Moe Aye o le Sui o le UNICEF i Samoa nei fa’apea le susuga i le Komesina Mauāluga o Ausetalia i Samoa nei iā H.E. Will Robison, o le ā fa’aauau pea ona galulue so’oso’otau’au ma Samoa e tauala atu i le Matāgaluega o le Soifua Mālōlōina, ina ia mautinoa e tumau pea le lelei, malu puipuia ma saogālēmū le auaunaga mo le puipuiga o le soifua mālōlōina o Samoa aoao, aemaise ai o le mautinoa ia faia tui puipui uma o fanauiti se’ia o’o lava i tagata mātutua.

O le fautuaga a Valasi mo ē o le ā fa’aāogaina lenei auaunaga, ina ia fa’aāoga ma le tatau ma ia fa’aeteete ma ia fai ma le alofa, ina ia ‘aua ne’i leaga lenei aseta tāua a le Mālō, o le ā fesoasoani malosi i le malu puipuia o tui puipui ma vailā’au mo togafitiga o gasegase ‘ese’ese i Samoa nei.

Na foa’i ai fo’i ma nisi o kalone lapisi auā lava le tausisia o le ola tumamā lautele i le falema’i.

Fa’ailoa e le Afioga iā Aiono Prof. Dr. Alec Ekeroma, o le Fa’atonu Sili Aoao o le Matāgaluega, o lo’o i ai nisi o fesoasoani fa’apea o lo’o foufou mai, ae ‘ese’ fo’i i latou o lo’o agalelei mai ai, ma ua fa’aāogaina fo’i nisi lava o loli fa’apitoa fa’apea, mo isi auaunaga, e pei ona agalelei mai ai nisi fo’i o pa’aga totino a Samoa mo le auaunaga lava tau soifua mālōlōina.

ATA: Pesetā Tusiga Taofiga (Author of Article) / Sāvali Newspaper.