Tatalo mai le Tausala ‘a Sāmoa Litara Allen ‘i le tapuā’iga ‘a le atunu’u ‘a’o sāuni atu ‘i le Miss Pāsefika 2025

‘O le aso 1 ‘i le 8 ‘o Fepuari 2025 ‘i le laumua ‘o Honiara ‘i le atumotu ‘o Solomona ‘o le fa’ataunu’uina ai le tauvaga ‘e sā’ilia ai le Tausala ‘a le Pāsefika 2025. ‘O le alo ‘o le atunu’u, le tama’ita’i ‘iā Moemoana Safato’a Schwenke, ‘o lē sā ‘avea ma Tausala ‘a Sāmoa 2023-2024, ‘o lo’o sē’ei ‘i le Miss Pacific ‘i le taimi nei.

‘A’o sāuni atu ai le Tausala ‘a Sāmoa, le tama’ita’i ‘iā Litara Allen, ‘o le Miss Sāmoa 2024-2025, ‘ua tatalo mai ai , mō le tapuā’iga ‘a le atunu’u, ‘i tāpenaga ‘uma ‘o lo’o feagai ai, ‘a’o alo atu ‘i le fa’amoemoe.

Na saunoa Litara, “ātonu ‘e faigata le ‘auala” ‘o le ‘a aga’i atu ai ‘i le tauvaga, ‘ae na ia fa’ailoa, ‘o lo’o fa’amoemoe ‘i le “ta’ita’iga ma le alofa ‘o le Atua, ‘o le ‘a ta’ita’i atu ai ‘o ‘ia.”

Na fa’ailoa ‘e le Tausala, ‘o lona tofiga ‘o lo’o sē’ei ai nei “’O se avanoa fo’i ‘e toe fa’amanatu ai ‘’i ona uso ‘uma ‘i Sāmoa” lō latou tāua, ‘e fa’apea Litara ‘o ‘i latou “’o tufuga tālenia, ‘o ni tinā gālulue mālosi, ‘o ni fa’aa’oa’o ‘i tū ma aganu’u, ma ‘o ni tagata ‘o lo’o ‘umia le tōfā ma le poto mō tupulaga fai mai ‘ina ‘ia mālolosi ai ‘i latou.”

‘E lē ‘o alotamala le Tausala mō le fa’amoemoe ‘i Honiara, ma le naunauta’iga, ‘e toe fo’i mai ma le manuia, ma ‘ia fa’aauauina ‘e Tausala ‘a Sāmoa lea tofiga, mō le isi tausaga.

ATA: Miss Sāmoa Pageant.