Tatala le vaipuna ‘a le āfio’aga ‘o Sāleapaga ‘i Lepā

‘Ua tatala āloa’iaina nei sē tasi ‘o polōketi sā fa’atautaia ma gāpātia ai le āfio’aga ‘o Sāleapaga ‘i Lepā, ‘i le māe’a si’osi’omia ma le toe fa’aleleia ‘o le fale ma ‘augutu ‘o le vai, ma fa’aleleia le ala simā ‘e āga’i ‘i lā lātou vaipuna. ‘O lēnei vaipuna ‘e fa’alagolago ‘iai le āfio’aga mō taimi ‘e fa’alētonu ai le suāvai ‘o le nu’u.

Na fa’aalia ‘e sui ‘o le āfio’aga, ‘o sē tasi lenei ‘o moemitiga ‘ua leva ‘ona mo’omo’o ‘iai, ‘e fa’aleleia lea tūlaga mo le saogalēmū ma le sefe ‘o le suāvai taumafa, fa’apēnā fo’i ‘i le tūlaga mo’omia mō aso ‘uma.

Na vala’aulia le Afioga ‘i le ta’ita’i ‘o le atunu’u, La’auli’alemālietoa Polāta’ivao Fosi Schmidt, ‘e saunoa ‘i le saunoaga ‘autū ‘e tatala āloa’ia ai lenei polōketi na fa’atupeina ‘i lalo ‘o le polōketi ‘o le $1 miliona. ‘I lana saunoaga ‘autū, na ia fa’ailoa ai ‘o le ‘a lē muta fesoasoani tāua ‘a le mālō mō lō lātou āfio’aga, ‘ātoa ai ma le naunauta’iga fa’avae, ‘ia ‘aua ne’i iai sē tasi ‘e taotaomia ai fa’amanuiaga mō lō lātou manuia.

IMAGE/ATA: Government of Samoa Facebook