Tatala āloa’ia polōketi ‘e 6 ‘a le itūmālō ‘o Sāfata 2

‘Ua tatala āloa’iaina nei polōketi ‘a le itūmālō ‘o Sāfata 2 ‘i ona āfio’aga ‘e 6, ‘e tofu ma le polōketi ‘ua māe’a ‘ona fausiaina.

‘O le āfio’aga ‘o Mulivai, ‘ua māe’a ‘ona fausia lana fale komiti ‘i luga ‘o lō lātou vai tā’ele. ‘O le āfio’aga ‘o Tafitoala, ‘o le toe fa’aleleia lea ‘o faleā’oga ‘a le ā’oga tūlagalua ma le āfio’aga ‘o Fausaga, ‘ua māe’a fausia se nofoaga po’o se maota, ‘e sulufa’i ‘iai le nu’u ‘i taimi ‘o fa’alavelave tutupu fa’afuase’i. ‘O Fusi, ‘ua toe fa’aleleia fo’i lona faleā’oga tūlagalua, ma Nu’usuatia ‘o lō lātou ‘auala ‘ua māe’a ‘ona fa’asimāina. ‘O Vaie’e, ‘ua toe fa’aleleia fo’i faleā’oga, ‘ātoa ai ma lā lātou ‘auala simā.

‘O le Afioga ‘i le ta’ita’i ‘o le atunu’u, La’auli’alemālietoa Polāta’ivao Fosi Schmidt, na fai ma sui ‘o le mālō ‘e momōlia le fa’afetai ma tatala āloa’iaina ia ātīna’e ‘a le itūmālō ‘o Sāfata 2, “[‘E] savali ‘i le $2 miliona mea ia ‘ua fa’ata’atitia lea ‘ua tātou va’aia ‘i le asō, [‘e] 6 polōketi tetele ‘e tatala ‘i le taimi ‘e tasi … ‘a’o le itū ‘e sili ‘ona tāua, ‘o lo’o lilifa ‘i alo ma fānau ma tupulaga lalovaoa.”

IMAGE/ATA: Government of Samoa Facebook (adapted by Nessani Lam Sam / SCR)