Tatala āloa’ia laupapa fa’ailoilo fa’atekonolosi ‘a le Sāmoa Post

 ‘O le fa’ai’uga ‘o le vaiaso na te’a nei, na tatala āloa’iaina ai ‘i lumā maota ‘o le fale ‘o le mālō ‘i ‘Ele’ele Fou, ‘ia laupapa fa’ailoilo fa’atekonolosi ‘a le Sāmoa Post, po’o le digital screen, lea sā tatalaina ‘e maimoaina ai le ta’aloga ‘a le Toa Sāmoa ma Papua New Guinea ‘i le ta’amilosaga ‘a le ipu ‘a le lalolagi ‘i le lakapī liki.

Pei ‘ona saunoa ‘iai le Afioga ‘i le Minisitā ‘o Feso’ota’iga ma ‘Auala Fa’atekonolosi, le tōfā Agaseata Tanuvasa Valelio Tanuvasa Peto, “O se fiafiaga tele ‘i lenei sauniga āloa’ia, ‘e fa’alauiloa ai le laupapa fa’asalalau fa’atekonolosi, LED Advertisement Big Screen ‘a le Fale Meli ‘o Sāmoa … ‘ua ātagia mai ai lō ‘outou naunauta’iga ‘i āvanoa tāua ‘e si’itia ai ‘au’aunaga mo le ātīna’eina ‘o pisinisi ‘i tūlaga ‘i suiga fa’aonapōnei, ‘e tali atu ai ‘i mana’oga tau ‘i feso’ota’iga mo se lelei mo pisinisi ‘a nai ō tātou tagata Sāmoa.”

‘O ia laupapa fa’ailoilo ‘ua fa’ailoa ‘e le Afioga ‘i le Minisitā, ‘o le ‘ā tu’uina ‘uma ‘iai fa’alauiloa ‘a matāgaluega ‘a le mālō, fa’atasi ai ma fa’asalalauga fa’alaua’itele ‘a nu’u ma āfio’aga, fa’apēnā fo’i ‘i itūmālō, ‘o aso fānau, ‘o fa’aipoipoga, fa’apea fo’i aso fa’apitoa mo fānau, tinā ma tamā ‘o le atunu’u. ‘Ua tatala atu fo’i le āvanoa ‘i pisinisi ma kamupanī mo ni ā lātou fa’alauiloa ‘e tu’uina ai ‘i luga.

‘O se fuafuaga ‘a le ‘Ōfisa ‘o le Fale Meli pei ‘ona fa’ailoa ‘e le Afioga ‘i le minisitā, mo se isi ālagātupe maua ‘a le fa’alāpotopotoga, ma fesoasoani ai fo’i ‘i le tamao’āiga ‘a le atunu’u.

IMAGE/ATA: Savali Newspaper Facebook