Tāpunia aloā’ia le Vaiaso ‘o Talosaga ma ‘Anapogi 2025

Ua tauāluga ma le manuia le Vaiaso o Tatalo ma Anapogi i lenei tausaga 2025, e pei ona fa’agasolo ai mo le tasi le vaiaso.

O le agaga atoa o lenei sauniga fa’aleMālō, e momoli ai le fa’afetai ma le vi’iga i le Atua Soifua auā o Ia o lo’o fa’avae ai Samoa.

O le vaiaso atoa lenei sa fa’amauina o le Vaiaso o Tatalo ma Anapogi mo Samoa atoa, e ‘ave ai le fa’amua i le Atua mo ana fa’amanuiaga ma lana puipuiga, e pei ona aiaia i totonu o le fa’avae o le Mālō Tuto’atasi o Samoa.

O le agaga atoa e ta’ui ai le vaiaso lenei, ia fa’asifo le atunu’u atoa i luma o le Atua ma le agaga o le loto mauālalo, ina ia afio mai Le Atua e ta’ita’i le savaliga a Samoa i lenei tausaga fou.

O le fa’avaeina mai o le vaiaso lenei o tatalo ma anapogi, na amata mai i le tausaga e 1990.

O le 1990 sa ‘āfatia ai le atunu’u i se tasi o āfa mata’utia, e i ai lava le talitonuga o le āfa lenā, sa o’o i le malosi o le category 5, o le malosi e gata ai āfa, o ‘Ofa lea.

E mae’a le āfa o ‘Ofa i le 1990, a’o le 1991 sa fa’atauto ai le Palemene fou.

O le masina o Fepuari o le 1991, sa toe a’afia ai fo’i Samoa i le āfa fulifaō o Valelia.

A’o avea le afioga i le To’oto’oali’i iā Tofilau ‘Eti Alesana ma Palemia o le atunu’u, na a’e ai lea o se tōfā i le Palemia ma lana Kapeneta, ina ia avea le vaiaso lenei ma vaiaso o talosaga ma anapogi.

E tolu fonotaga tatalo tāua na afua mai le 1990 ina ua mae’a ia āfa tetele e lua.

Muamua, o le vaiaso o Tatalo ma Anapogi,

Lua, faia o fono tatalo a le Mālō i Aso Lulu uma o vaiaso ta’itasi, mai iā Ianuari se’ia aulia Tesema o tausaga ta’itasi.

Ma le Tolu, o le Prayer Breakfast po’o le Fono Tatalo a le Fono Aoao Faitulafono a Samoa, e fa’ai’u ai ana galuega o le tausaga, ma e fa’ataunu’u lea sauniga fa’apitoa i le fonotaga mulimuli a le Palemene iā Tesema o tausaga ta’itasi.

Mo le silafia, o lea Sauniga Fa’apitoa o lo’o ua ta’ita’ia nei e le Fono Aoao a Ekalesia So’ofa’atasi i Samoa ae o lo’o lagolagosua ai le Mālō i lona tafatolu fefa’atauāgai.

I fa’amaumauga i tausaga ua tauna’i, o le 2004, e lima āfa sa valoia e a’afia ai Samoa, peita’i e le’i mafai ona fa’amatalaina e le Ofisa o Va’ai Tau le mafua’aga na lē o’o mai ia āfa.

O le 2009 sa a’afia ai Samoa i le Tsunami, soso’o ai ma le āfa o Eveni, o lologa ae fa’apea fo’i i le Misela ma le Koviti – 19.

O le tatou talitonuga maumaua’i lenā i luma o le Atua.

I le Fa’amauina o le Vaiaso o Tatalo ma Anapogi i lenei tausaga, na saunoa ai le Ta’ita’ifono o le Fono Aoao a le Ekalesia Fa’apotopotoga Kerisiano i Samoa – E.F.K.S. i le Susuga i le Faifeau Toeā’ina iā Rev. Tunumoso Soliola Iosia, i le tāua o le usita’i ma faia le amiotonu a le Atua.

E pei ona ia fa’amatalaina ai le tala iā Noa ma le fa’asaoina mai e le Atua o ia ma lona ‘āiga mai le lolo, ina ua fa’amamāina le lalolagi mai tagata agasala ma le lē amitonu.

O lana tu’uālalo i le Mālō, Ekalesia Kerisiano uma i le atunu’u fa’apea Samoa aoao, ina ia tautuanā ia faia le amiotonu e tusa ma le finagalo o le Atua i so’o se valā’auina ua totofi ai tatou e lo tatou Matai Sili.

Ma e o’o mai i le taimi nei, o lo’o fa’aauau pea i vaiaso uma le tatalo ma anapogi i le Ali’i, o lona uiga, o lo’o sosolo lava i le fa’atuatua i le Atua ma lona Agaga Pa’ia e ala mai ai manuia mo Samoa aoao ma ona tagata.

O lenei vaiaso sa anapopogi uma ai le atunu’u atoa ma fa’atoga atu i le Atua, ina malutia o tatou lau’ele’ele mai fa’ama’i, o mala fa’alenatura, o fa’alavelave fa’afuase’i ma ni āfa fulifaō e ma’imau ai lo tatou ola a’o folau ai ma le fa’atuatua i galuega tau amata o lenei tausaga fou.

O lenei sauniga fa’apitoa, sa fa’ataunu’u i le Maota Tatalo o le Mālō i Palisi.

Tusia: Pesetā Tusiga Taofiga

ATA: Peseta Tusiga Taofiga / Sāvali Newspaper.