Tāpena le ‘Āsosi ‘o Tagata Tauaso ‘i Sāmoa ‘e fa’amanatu le International White Cane 2024

‘Ua tāpena le ‘Āsosi ‘o Tagata tauaso po’o ‘i latou ‘e pō le va’ai ‘i le atunu’u ‘i se faigāpā’aga ma le ‘au’aunaga ‘a le Nuanua ‘o le Alofa (NOLA) ‘e fa’amanatu fa’atasi ai le International White Cane mō lenei tausaga 2024, po’o le fa’atāua ‘i le to’oto’o pa’epa’e fa’asino ala.

‘O le International White Cane Awareness days, ‘e fa’amanatuina ‘i tausaga ta’itasi ‘i le aso 15 ‘o ‘Ōketopa mā ‘e fa’apitoa mō tagata tauaso ‘e avea ai le cane po’o le to’oto’o pa’epa’e fa’asino ala, ‘o se meafaigāluega ‘e fa’amālosia ma fa’alauiloa o latou tōmai ‘e ausia ai se olaga ‘ātoatoa mā tūto’atasi.

‘O se faʻamatalaga mai le NOLA na faʻaalia ai, ‘o lenei to’oto’o pa’epa’e, ‘o se meafaigāluega aogā tele “E mafai ai ‘ona matou feoa’i sa’oloto ma saogalemu mai lea nofoaga ‘i lea nofoaga – pe ‘i le galuega, ‘i le āʻoga, poʻo si o matou pitonuʻu.”

“Ua silia ma le 10 tausaga talu ‘ona tatou tutū fa’atasi ma le lalolagi ‘i le fa’amanatuina ‘o le aso ‘o le to’oto’o pa’epa’e fa’asino ala,” o le saunoaga lea ‘a le Pule Sili ‘o le Nuanua ‘O le Alofa Matā’afa Fa’atino Utumapu.

ATA: Taunuuga Toatasi / Sāvali Newspaper.