Tāpā ‘e le Afioga Fiamē Nāomi Matā’afa se tulafono ‘e aiaia ai su’esu’ega mo fuālā’au fa’asāina mo Sui Faipule ‘o le Palemene

‘Ua fa’amanino ‘e le Afioga ‘i le Sa’o Fa’apito, Fiamē Nāomi Matā’afa, ‘o le faipule ‘o le itūmālō ‘o Lotofaga, le fuafuaga ‘a le ta’ita’i ‘o le atunu’u ‘e faia ‘uma su’ega ‘o faipule mo fuālā’au fa’asāina, ‘e pei fo’i ‘ona tu’uina atu ai le poloa’iga ‘a le ta’ita’i ‘o le atunu’u, ‘i le ‘aufaigaluega ‘uma ‘a matāgaluega ‘a le mālō.

Peita’i na ia toe fa’amanino lona finagalo ‘i fafo mai ‘o le palemene, ‘i sui ‘o le ‘au tusitala, ‘o ananafi na fa’ataunu’uina ai su’esu’ega ‘i le maota ‘o Tofilau mo sui ‘o le Palemene, se’ia vaganā ai sui ‘o le Kapeneta, lea pei ‘ona fa’amanino ‘e le Afioga ‘i le Fofoga Fetalai, ‘e fa’atino lava a latou su’ega ‘i le potu ‘o le Kapeneta.

Na fesiligia fo’i ‘e le ‘au tusitala ‘ia le Afioga ‘i le Faipule ‘o le itūmālō ‘o Faleata numera tolu, le Afioga Leala’ilepule Rimoni ‘Aiafi, ‘ona ‘o ia leisi faipule ‘o lo’o laumanu’ia solo lona suafa ‘i tu’ua’iga ‘o lo’o iai lona so’otaga ma le fa’aogaina ‘o fuālā’au fa’asāina.

‘Ua tapena le tūlāfono ‘e lima ta’ita’iina ai su’esu’ega ‘e fa’atino mo sui ‘o le palemene ‘i fuālā’au fa’asāina ‘atoa ai ma tagata faigaluega ‘o le mālō.

IMAGE/ATA: Parliament of Samoa