Ta’oto le poloketi ‘e fausia ai se ‘ōfisa tūtotōnu fou ‘a le Fa’alāpotopotoga ‘o le Suāvai ‘i Vaitele

‘Ua taoto le poloketi ‘a le Fa’alāpotopotoga ‘o le Suāvai ‘a le atunu’u ‘i le toe fausia ai lea ‘o se isi ana ‘ōfisa tūtotōnu ‘i Vaitele, ‘e suia ai lona fale tuai lea ‘ua sīlia nei ma le 20 tausaga ‘e pei ‘ona fa’amaonia mai ‘e le ‘Ōfisa Sili ‘o le Fa’alāpotopotoga Fuimaono Dominic Schwalger, ‘o le gāluega ‘ua māe’a ‘ona pāsia ‘e le kāpeneta mā ‘o lona tau ‘e 40 miliona tālā fa’atasi ai ma le 10 miliona tālā ‘a le fa’alāpotopotoga ‘o le suāvai ‘o lona sao lea ‘i le fa’atupeina ‘o le gāluega.

‘O le ata ‘ua tūsia mō le ‘ōfisa tūtotōnu fou ‘a le fa’alāpotopotoga ‘o le suāvai ‘ua laina tūtusa ma moemitiga ma fa’anaunauga ‘a le faigamālō mai le tausaga 2021 ‘i le tausaga 2026, ‘ia taula’i atina’e fausia ‘i ta’iala ‘e fa’aaogāina ai mālosi’aga fa’afouina ‘ina ‘ia o’o atu ai le ‘au’aunaga mō le atunu’u ‘atoa ‘i lona tūlaga ‘atoatoa, ‘aemaise lona ‘ausia fo’i ‘o le fa’amoemoega ‘ia taugofie le ‘au’aunaga ‘o le suāvai mō le atunu’u lautele.

‘O le fa’amalosi’au ma le lu’itau mai le Afioga ‘i le Sui Pālemia le Afioga Tuala Iosefo Ponifasio mō le ‘au’aunaga, ‘ia ‘ave le latou fa’atāua mā le fa’amuamua ‘i mana’oga ‘o le atunu’u ‘e tauala ‘i le suāvai.

ATA: Supplied. Sāmoa Water Authority