Talosaga le Mālō Sāmoa ‘i se fa’amatalaga aloā’ia mai le Mālō Solomona ‘i le taofiga ‘o Leiataualesa Jerry Brunt ‘i le malaeva’alele

‘I se fa’amatalaga mai le ‘Ōfisa ‘o le Pālemia, ‘o lo’o fa’ailoa ai le talosaga ‘a le Mālō Sāmoa ‘ua tu’uina atu ‘i le Mālō Solomona, ‘e ala atu ‘i le ‘Ōfisa ‘o le Lōia Sili ‘a le atunu’u, mō se fa’amatalaga aloā’ia ‘i le taofia ai ‘o le Afioga ‘iā Leiataualesa Jerry Brunt ‘i le malaeva’alele ‘i Honiara ‘i le taeao nei.

‘O le Afioga ‘iā Leiataualesa Jerry Brunt, ‘o lē sā ‘avea ma Fa’amasino Ulu ‘o le tauvaga ‘o le Miss Pacific Islands 2025, lea na manumālō ai le Tausala ‘a Sāmoa, Litara Ieremia-Allan.

‘O lo’o lauāluga ‘i tusitusiga ‘i ‘upegatafa’ilagi ‘i le taimi nei, le fē’avea’i ai ‘o fa’amatalaga fa’atupu, ma le lē fa’amaonia, ‘o lo’o tu’ua’ia ai le Afioga ‘iā Leiataualesa Jerry Brunt, ‘i lona fa’atinoina ‘o se tūlaga fa’a’au’au, na manumālō ai le tausala ‘a Sāmoa, ‘ae ‘o le tausala ‘a Tonga sā tatau ‘ona mālō.

‘O nei tu’ua’iga na ‘amata mai ‘i se fa’amatalaga lē fa’amaonia ‘a se sui fa’amasino mai Tonga, ‘ua vevesi ai le to’atele ‘i le taimi nei, ‘e lē gata ‘o tagata lagolago ‘a Sāmoa, ‘a’o Tonga fo’i.

‘Ua o’o atu ai nei le fesoasoani fa’atūlāfono ‘i Solomoa ‘e fesoasoani ‘i le Afioga ‘iā Leiataualesa, ‘a’o tālia ai se fa’amatalaga mai le Mālō Solomona.

ATA: Sourced from Samoa Observer.