LISTEN LIVE

Tali le Pālemia ‘i le fa’afītāuli ‘o le Motusia so’o ai ‘o le ‘Eletise ‘i le atunu’u

by | Mar 24, 2025 | Sāmoa

Ou te faatalofa ma faafeiloai atu i le tapuaiga mamana a si o tatou atunuu i ona muliauma eseese i lenei vaega o le aso. Viia le Atua e ona le Malosi uma, i lona tapuaaoina o le soifua manuia o lo tatou atunuu.

O lenei faasilasilaga e faapitoa i le faafitauli tau eletise o loo feagai ma le atunuu. E ao ona tuuina atu se faamatalaga mai lo tatou Malo, mo le nofo silafia e lo tatou atunuu o le tulaga pagatia ua feagai nei ma le Faapotopotoga o le Malosiaga Faaeletise.

E muamua ona momoli atu se faafetai e fai ai a’u ma sui o le Malo, i le lava papale o lo tatou atunuu, ao feagai ai le tatou Faalapotopotoga ma faafitauli o la latou auaunaga i lenei vaitau.

Ua matauina le aafia tele o lo tatou atunuu i le motusia o le eletise i le tele o taimi, aemaise lava i aiga, o kamupani ma pisinisi, faapena foi i le mamalu o afioaga taitasi i Upolu nei.

E faailoa atu ma le faaaloalo, o loo faaauauina pea lava galuega a le Faalapotopotoga, i le faaleleia o tulaga uma i se tulaga faanatinati, ina ia fo’ia fa’afitauli o loo tatou feagai ai nei, ma toe fa’aleleia ai i se taimi vave ma saogalemu, le auaunaga tuuina atu o le eletise, i si o tatou atunuu.

Mafua’aga o le Motusia o le Eletise:

Talu mai le masina o Fepuari 2025, na amata feagai ai le auaunaga a le Malosiaga Faaeletise ma tulaga faaletonu o le eletise, ona o mafuaaga nei:

  1. Fa’aletonu o Laina Eletise Malolosi i le Eleele – O le faaletonu ai o se vaega o laina eletise malolosi i le eleele (underground cable) o loo taoto amata mai i le fale afi i Fiaga e agai atu i le fale afi i Fuluasou, na ala ai ona motusia le eletise i le motu atoa o Upolu, i le Aso 23 o Fepuari. O le isi vaega o le laina eletise lava lenei, na toe fa’aletonu i le aso 25 o Fepuari na toe motusia ai foi le eletise mo le motu atoa o Upolu ma na faatinoina iai galuega faaleleia i lea aso.
  2. Matagi malolosi ma uiga loulouā ole Tau – O aafiaga o le tau, i savili ma timuga mamafa i le Aso 9 o Mati, na aafia tele ai le auaunaga i vaega na alia’e mai ai. E le gata ole fa’aleagaina o pou moli eletise, ae faapea foi i laina eletise malolosi ile auala, faapea maota ma laoa. E le gata i lea, ae o le mafuli ai o laau i luga o laina, ma avea ma vaega tele na motusia atu ai le eletise i le atunuʻu atoa.
  3. Fa’aletonu o afi o loo gaosi ai le eletise – O le aso 15 o Mati, na faamauina ai le fa’aletonu o nisi o afi eletise autū e tolu o loo gaosi ai le eletise o loo tuuina atu i lo tatou atunuu.

O nisi o ia afi e aofia ai:

  • Afi Numera 1 i Fiaga (Afi Tiso – 5 MW) – O se faaletonu i le vaega autu e fesoasoani tele ile afi (piston) ole afi Numera 1 i Fiaga, e 10 i le 12 masina e tālia ai lea tōtōga, aua e le o se tulaga faigofie ona saili.
  • Afi Numera 7 i Tanugamanono (Afi Tiso – 3 MW) – O se fa’aletonu i le totoga o le afi lenei (turbocharger) e fesoasoani tele ile gaosia ole eletise e tusa ma le 4 vaiaso e fa’aleleia ai.
  • Numera 1 i Taelefaga (Eletise e maua mai le Suavai – 2 MW) – O le afi lea ua faailoa mai ua faaletonu se vaega (bearing) o loo faafaigofieina le taaviliga o pe’ape’a mo le gaosia o le eletise, ma e moomia le tolu masina e faatinoina ai le galuega faaleleia ina ia toe faafoisia i se tulaga lelei atoatoa.

O faaletonu nei ile auaunaga ua aveesea ai le 10 MW o le malosiaga o le eletise sa masani ona siitia ai le auaunaga, ma ua avea ma mafuaaga tele, ua faatinoina ai e le tatou Faalapotopotoga o le EPC le fuafuaga o loo faatinoina nei mo le faasoasoaina o le malosiaga faaeletise o loo gafatia i lenei taimi. Na amataina le tatou galuega lena, i le Aso Sa, 16 Mati.

Galuega Faagasolo mo le Fo’ia o Fa’afitauli nei ma Siitia le Auaunaga mo Samoa

O le naunautaiga lava ina ia fo’ia ma toe faaleleia le auaunaga malosiaga faaeletise i le atunuu, ua galulue ai nei le Malo ma le EPC i vaega nei:

  1. Afi Eletise Faafaigaluegaina (Hire) e lima mo le taimi nei – O lo’o fa’amoemoe e taunuu mai afi eletise mo le faafaigaluegaina (hire) mo lenei taimi, ina ia fesoasoani i le eletise tuuina atu mo le motu i Upolu. E tusa le ma le 5 MW le malosiaga e gaosi mai e afi eletise nei e 5, ma o le Aso 5 o Aperila o le a taunuu mai ai ile atunuu.
  2. Afi Eletise Fou – Ua i ai le fuafuaga a le Malo e fa’atauina mai ni afi eletise fou se lua (4 MW) mai le kamupani a le HNAC i Saina, ma e fa’amoemoe e taunuu mai ia Aokuso o le tausaga nei.
  3. Galuega fa’aleleia i Afi Eletise – O lo’o faaauauina pea galuega fa’aleleia mo afi eletise Numera 7 i Tanugamanono ma le Afi Numera 1 i Taelefaga, ina ia toe faaopoopo ai le malosiaga e 5 MW pe a mae’a galuega.
  4. Faaopoopoina o Malosiaga Faafouina (Renewable Energy) – O le a siitia le auaunaga maua mai i malosiaga faafouina, ma ole masina o Tesema 2025 o loo faamoemoe e tatala alaoia ai le auaunaga “Malosiaga Faafouina mai le La” (Solar Farm) e maua mai ai seisi faaopoopoga o le malosiaga faaeletises (10MW) faatasi ai ma “maa” (battery storage) talafeagai, e mafai ona fafaga iai le malosiaga mai le la, ma siitia ai i le 20% le malosiaga tau eletise o le a faaopoopo ile eletise gaosi mo le atunuu.

Fa’ai’uga

O lo’o tumau pea le naunauta’iga i le Malo e tauala atu i le EPC e siitia ma fa’alautele le malosiaga ina ia mautinoa le lelei atoatoa ma le fa’atuatuaina o le auaunaga mo Samoa i taimi uma. Ua matauina lava le siitia o le eletise moomia poo le eletise faaaogaina e le tatou atunuu i le lua tausaga ua tuana’i, ma galuega ua faailo, o le a fesoasoani tele e fo’ia ai lenei faafitauli mai le toe faaono tula’i mai i le lumana’i.

E momoli atu ai le fa’afetai tele i le paia ma le mamalu tele o si o tatou atunu’u i lo outou finagalo malamalama, aemaise o lo outou lava papale, a’o taumafai atu le Faapotopotoga o Malosiaga tau Eletise i le mafai e gata ai, ina ia siitia ma faaleleia lana auaunaga, aua le gafataulimaina o le malosiaga o le eletise mo si o tatou atunuu.

FAAFETAI!

Release issued via Government of Samoa Facebook Page
24 March 2025, 5:22pm (NZT)

ATA: Government of Samoa (Leaosa Faaifo Faaifo)