Ta’itā’ia ‘e Sāmoa le sāvavali ai ‘i fafo ‘o Ta’ita’i ‘o Mālō Lāiti Tauatia’e (AOSIS) ‘i feutaga’iga ‘i le COP29

‘I se gaiōiga mata’ina ‘i le fonotaga lona 29 ‘ua fa’aigoaina ‘o le COP29 mō le Sūiga ‘o le Tau na tauāluga ‘i le vaveao ‘o le Aso To’ona’i ‘i Azerbaijan ‘i le atunu’u ‘o Baku, na va’aia ai le sāvavali ai ‘i fafo ‘o Ta’ita’i ‘o Mālō Lāiti Tauatia’e po’o le fa’alāpotopotoga ‘o le Alliance of Small Island States (AOSIS), mai ‘i ni feutaga’iga na fa’atinoina ‘i le fono. ‘O lenei savali na ta’itā’ia ‘e Sāmoa, ‘e le Afioga ‘i le Minisita ‘o le Matāgaluega ‘o Puna’oa Fa’alenātura ma le Si’osi’omaga ‘iā Toeolesulusulu Cedric Schuster.

Na saunoa Toeolesulusulu, ‘ua māfua ‘ona sāvavali ‘i fafo le AOSIS ‘i ia feutaga’iga lē tūmau ‘i luga ‘o le New Collective Quantified Goal (NCQG) ‘ina ‘ua manatu le fa’alāpotopotga, ‘e “lē ‘o ofoina mai ‘e mālō tetele, ‘o lo’o solomua ‘i le fa’atuputeleina ‘o a’afiaga fa’alētonu ‘i le si’osi’omaga, se ‘auala alualu ‘i luma ‘e fō’ia ai faigata ‘ona ‘o le sūiga ‘o le tau.”

Na saunoa le Minisita, ‘o ia fo’i ‘o le ta’ita’ifono ‘o le AOSIS, ‘āfai ‘e lē mafai ‘ona fa’amāoni mālō tetele ‘i le fa’atupeina ‘o taumafaiga mō le sūiga ‘o le tau, mā iai ni fa’atinoga, ‘ae lē na’o ‘upu ma tala, saunoa Toeolesulusulu, ‘o le ‘a matuā faigata lava mō atunu’u ‘o le AOSIS ‘ona fa’aauau ‘ona ‘auai ‘i le COP29, ma isi fonotaga ‘i le lumana’i.

ATA: Supplied / Sāmoa Capital Radio.