Suiga ‘i nisi ‘o Komiti Fa’apalemene ‘a le Fono Aoao Faitulafono ‘a Sāmoa

Ua fa’amaonia e le Fono Aoao Faitulafono a Samoa, suiga i tofiga o nisi o Faipule o le Palemene, ua vaevaeina i Komiti Fa’apalemene.

I le saunoaga a le afioga i le Sui Ta’ita’ifono o le Komisi Fa’apalemene, o ia fo’i o le Sui Fofoga Fetalai o le Maota Fono a Samoa iā Afamasaga Leone Mati Va’ili Masame, na ia talatala manino ai suiga ua faia e tusa ai ma le Vaega 170[2][a][b][c] o le Tulafono Tumau o le Palemene e pei ona tu’uina mai ai le fautuaga a le Komiti Fa’apalemene.

O nei suiga e aofia ai;

Komiti Fa’apalemene o Tulafono Tumau: Matā’upu Tau Faigā Palota, Talosaga ma Tofiga Fa’ale-Fa’avae.

Tofia ai le afioga iā Lupematasila Lavea Tologatā Tile Leia e sui tulaga i le Susuga iā Hon. Tuila’epa Lupesoliai Dr. Sa’ilele Malielegaoi ua fa’amavae mai lea Komiti.

Mo le Komiti Fa’apalemene o le Vaega Tau le Tamāo’āiga, ua tofia ai le afioga iā Tunumafono Clare Tai Tin e suia le afioga iā Taitu’ave Lafaitele Valo’aga Ta’aitiiti Iona.

O le afioga iā Hon. Lautimuia Uelese Va’ai ua tofia nei e sui tulaga i le afioga iā Taioali’iseu Fiti Aimaasu, ae ua filifilia nei le afioga iā Faumuinā Opapo Oeti e suia le afioga iā Motuopua’a Henny Papāli’i.

Ma le Komiti Fa’apalemene o le Vaega o Atina’e ‘Ese’ese, ua tofia ai le afioga iā Motuopua’a Henny Papāli’i, e suia le afioga iā Amituana’i Malolo Tautofi Roma.

O lea lafo na pāsia aloā’ia i le Aso Lua, 16 Iuni 2026, ina ua toe tauaofia le Fono Usu a Samoa.

Written by: Peseta Tusiga Taofiga (Savali Newspaper)

IMAGE/ATA: Savali Newspaper