Suia le igoa ‘o le Matāgaluega ‘o Tinā ma Tama’ita’i, Ātīna’e ‘o Nu’u ma Agafeso’ota’i ‘i le Matāgaluega ‘o ‘Āiga ma Agafeso’ota’i

‘Ua folasia ‘e le Kāpeneta ‘i le fonotaga ‘i le vaiaso talu ai, le suia ai lea ‘o le igoa ‘o le Matāgaluega ‘o Tinā ma Tama’ita’i, Ātīna’e ‘o Nu’u ma Agafeso’ota’i ‘i le Matāgaluega ‘o ‘Āiga ma Agafeso’ota’i.

‘Ua finagalo le faigāmālō ‘e suia le igoa ‘o le matāgaluega, ‘ina ‘ia iai le so’otaga vāvālalata ma itūmālō, ‘e galulue fa’atasi ai ona fono fa’avae ma matāgaluega ‘uma ‘o le mālō, ‘i se so’otaga ‘e manuia ai ‘āiga ‘uma ‘o le atunu’u.

‘O nisi ‘o fesoasoani ‘ua fausia ‘e le mālō ‘i lenei so’otaga ‘e suia ai le igoa ‘o le matāgaluega, na fa’aalia ‘e le Afioga ‘i le Minisitā ‘o le Matāgaluega, le Afioga ‘ia Moefa’auōuō Julius Ah Kui Tafuna’i:

“O fesoasoani mo le fausiaina ‘o maota ma laoa ‘o ‘āiga ‘e vaivai a lātou tamao’aiga, ‘o le ‘a si’itia ‘i le $2 miliona … ‘o le ‘a fa’aleleia atili ai itū’āiga fausaga ‘o maota ma laoa, ‘ina ‘ia lagolagoina le saogalēmū ma le lelei ‘ato’atoa ‘o maota mo ‘āiga ‘o le ‘a agava’a ‘i lenei fa’amanuiaga. ‘Ua ‘uma fo’i ‘ona fa’amausalī ma fa’amautū fesoasoani tau tupe po’o grants ‘e tu’uina atu ‘i NGOs ‘ona ‘o le tele fo’i ‘o le lātou sao ‘i ātina’e ‘o le atunu’u …”.

Na saunoa le Minisitā, “O le ‘a fa’aauau fo’i polokalame ‘o le ātia’e ‘o fānau lāiti ma tupulaga talavou. ‘O le ‘a fa’atinoina fo’i le National Disability Action Plan, … ma fa’amālosia le galulue fa’atasi ‘o matāgaluega, nu’u, ‘ēkālēsia … ‘i le ātina’eina ‘o fānau ma tupulaga talavou”.

IMAGE/ATA: SCR (file). 
Note: Not the official logo of the new ministry. Generated by SCR using GOVT emblem, and name of ministry.