Sāuni le HRPP ‘e fa’atū le lafo ‘o le lē fa’atuatuaina ‘o le Pālemia ma lana faigāmālō pe ‘a lē fofōina lenei gasegase

‘I se tusitusiga fa’alaua’itele ‘a le Ta’ita’i ‘o le Itū Agai, le susuga ‘iā Hon. Tuilaepa Dr. Sailele Malielegaoi, ‘ua fa’ailoa ai se la’asaga ‘e ono o’o atu ai le gasegaseāmālō ‘o lo’o feagai nei ma le atunu’u ‘i le fesiligia ai ‘o le ta’ita’iga ‘a le Pālemia Hon. Fiame Naomi Matā’afa ma lana kapeneta, ta’inane le vāegafa’a’upufai ‘a le Fa’atuatua ‘i le Atua Sāmoa ‘ua Tasi (FAST).

Na fa’ailoa ‘e le Ta’ita’i ‘o le Itū Agai:

1. ‘Ua lē toe iai se lagolago mālosi ‘i le ta’ita’iga ‘a le Afioga ‘i le Tama’ita’i Pālemia, ‘ina ‘ua na’o le 5 Minisita mautinoa ‘o lo’o lagolagoina lana ta’ita’iga;
2. ‘E 29 faipule ‘o lo’o lagolagoina le Afioga ‘iā La’auili Leuatea Schmidt

‘O lea na fa’ailoa ai ‘e Tuilaepa, le lē pāleni ma le lē mautū ‘o le faigāmālō ‘a Sāmoa ‘i le taimi nei, mā ‘o lo’o manino le fa’avae, “‘O se Pālemia ‘e lē ‘o toe ‘ūmia le fa’atuatuaga, ‘ia lē itiiti ifo ma le 27 ‘o faipule, ‘e tatau ‘ona fa’amāvae, ma fa’ataga le atunu’u ‘e toe filiafilia le mālō, ‘e ala ‘i se palota vave (snap election).

‘Ua fa’ailoa fo’i ‘e le Ta’ita’i ‘o le Itū Agai, ‘o le tali atu ‘a le HRPP ‘i lenei gasegase, ‘ua tapā ai se fa’amālamalamaga fa’alēfa’avae mai le Fa’amasinoga ‘i lenei matā’upu. Ma ‘ua fa’ailoa fo’i, āfai ‘ae lē fofōina lenei gasegase ‘i fafo atu ‘o le Palemene, ‘ua sāuni le HRPP ‘e fa’atū le lafo ‘o le lē fa’atuatuaina ‘o le Pālemia ma lana faigāmālō ‘i se fonotaga ‘o lumana’i nei, ‘a le Palemene.

ATA: Parliament of Sāmoa.