Sāuni le fa’ata’itā’iga ‘o leo sailini mō fa’alavelave fa’afuase’i ‘i le 3PM Aso Gafua 03 ‘o Mati 2025

‘O le tā ‘o le itūlā ‘e 3PM ‘i le afiafi ‘o le Aso Gafua 03 ‘o Mati 2025 ‘o le ‘a fa’atinoina ai le fa’ata’itā’iga ‘o leo sailini mō fa’alavelave fa’afuase’i ‘e pei ‘ona fa’asilasila ‘e le Matāgaluega ‘o Puna’oa Fa’alenātūra ma le Si’osi’omaga (MNRE).

‘O le afio’aga ‘o Lalovaea, Magiagi, Malae Tā’alo ‘i le Apia Park, nofoāga ‘o le EPC ‘i Tanugamanono, ‘Ōfisa Tūtotonu ‘o le Matāgaluega ‘o Ā’oga ma Aganu’u ‘i Mālifa, fa’atasi ai ma sailini ‘o lo’o ‘i itū ‘i Saute ‘o Upolu ‘e ‘āmata mai Aleipata ‘e āga’i atu ‘i Mulifanua – ‘o nofoāga nei ‘o le ‘a fa’atino ai lea fa’ata’itā’iga.

‘Ua fa’ailoa ‘e le MNRE, ‘o lenei fuafuaga ‘e mō le māta’itūina ‘o le tūlaga lelei ‘o nei ‘āseta tāua, mō le saogālēmū ‘o le mamalu ‘o le atunu’u ‘i taimi ‘o fa’alavelave mātuiā.

‘Ua fa’ailoa fo’i ‘e le ‘Ōfisa Sili ‘o le Pūlega. Susuga Lealaisalanoa Francis Brown Reupena, ‘e talosagaina le mamalu ‘o le atunu’u ‘ina ‘ia tautuanā lenei galuega, mā ‘e lē fa’apopoleina ai, ‘ua na’o se fa’ata’itā’iga.

‘Ua fa’ailoa fo’i ‘e Lealaisalanoa, ‘e fa’apea ‘o lenei fa’amoemoe, ‘o le ‘a fa’aauauina ‘i Aso Gafua muamua ‘o māsina ta’itasi, ‘i le itulā ‘e 3PM ‘i le afiafi.

ATA: SCR (file) / MNRE.