Sāuni le Afio’aga ‘o Leauva’a ‘e fa’ae’e le sūafa Tagaloa ‘i le afiafi nei ‘i le Pālemia ‘o Fiti Sitiveni Rabuka

‘O le ‘a tele ni pine ‘e fa’amau ai ma manatua pea le taligā mālō ‘a Sāmoa ‘i le fonotaga ‘a ta’ita’i ‘o mālō ‘o le taupulega ‘i le māsina lenei ‘o ‘Oketopa ‘i le tausaga 2024. ‘O le asō, ‘e fa’ae’e ai le sūafa matai ‘o le Pālemia ‘o Fiti, Sitiveni Rabuka ‘e le afio’aga ‘o Leauva’a.

Na fa’amaonia mai ‘e le sui ‘o le afio’aga ‘iā Vaifale ‘e fa’apea ‘o le sūafa Tagaloa ‘o le ‘a fa’ae’e ‘iā Sitiveni Rabuka.

‘E leai ni so’otaga mā le Pālemia, ‘ae ‘o le manatu, ia fai ma tala ‘a’ave ‘aemasie ‘o tala fa’asolopito ‘e fai ma pine fa’amau, ‘o le taligā mālō ‘a Sāmoa.

‘O Leauva’a ‘o le latou atunu’u talimālō mō le CHOGM le mālō Fiti, ma ‘ua māe’a ‘ona ūia ‘uma ‘auala mō le saogālēmū ‘o Rabuka.

‘O le ‘itūlā ‘e 4 ‘i le afiafi ‘e fa’atino ai le sauniga ‘o le fa’ae’eina ‘o le sūafa Tagaloa ‘i le Pālemia ‘o Fiti.

ATA: Sitiveni Rabuka (Sāmoa Capital Radio file)