Sāmi le 100 tausaga ‘o le Mālisi ‘i Sāmoa

‘O le taeao ‘o le Aso Lua 30 ‘o Iulai 2024, na patipātia ai le sāmiga ‘o le āulia manuia ‘o le 100 tausaga talu ‘ona fa’avaeina le ‘Āiga Mālisi ‘i Sāmoa.

‘O le ‘Asosi ‘a Mālisi ‘ua ola ma ‘ua lauusiusi, ma ‘ua tele fo’i tamafānau ‘a Samoa sa fa’afailele mai ‘i le Mālisi, ‘ua lātou ‘umia fo’i tofiga mauāluluga ‘i le Mālō, ‘o ‘Ekalesia fa’apea Fa’alāpotopotoga Tumā’oti ‘i Sāmoa nei ma atunu’u ‘e mamao.

Na fa’amanuia ma fa’afetaia ‘e le Ta’ita’i ‘o le Mālō Fiamē Naomi Matā’afa ‘i lana saunoaga ‘autū, le tūlaga ‘o le maopoopo pea ‘o le Mālisi, ma ‘o lo’o maua’a pea le fa’avae papa ‘o le ‘āiga, ‘aemaise ‘o lona sao tāua ‘i le ātina’eina ‘o le tamāo’āiga ‘o le atunu’u ‘e ala ‘i ana tamafānau sa fa’afailele.

Na faia se savali fa’aaloalo na tatala aloā’ia ai sauniga fa’apitoa ‘uma mo lea fa’amanatuga, ‘ona soso’o ai lea ma le Sauniga Lotu ma fa’apa’iaina ai le keke ‘o le Aso Soifua ‘ua aulia manuia ai le 100 tausaga ‘o le Malisi.

ATA: Leaosā Fa’aifo Fa’aifo / Savali Newspaper.