Sainia ‘e le Afioga ‘i le Palemia le feagaiga ‘i le fa’aaogāina ‘o le $250 miliona mai le mālō ‘o ‘Ausetālia ‘i le ātīna’eina ‘o le Lakapī Liki ‘i le Pasefika

‘Ua sainia ‘e le Afioga ‘i le ta’ita’i ‘o le atunu’u, le Afioga La’auli’alemālietoa Polata’ivao Fosi Schmidt, le feagaiga ‘ua tu’uina mai ai ta’iala ‘o le fa’aaogāina ‘o le sēleni mai le mālō ‘o ‘Ausetālia. ‘E $250 miliona le sēleni na fa’ameaalofa ‘e le mālō ‘o ‘Ausetālia ma le fa’anaunauta’iga, ‘e fa’aleleia ma ātīna’eina ai le ta’aloga ‘o le lakapī liki ‘i totonu ‘o Toga, Fiti, Sāmoa ma Papua Niu Kini.

‘O se feagaiga ‘ua saini lima le Afioga ‘i le Palemia ‘o le mālō ‘o ‘Ausetālia ‘ia Anthony Albanese, ‘o le ta’ita’i ‘o le tātou atunu’u fa’atasi ai ma le Palemia ‘o le mālō ‘o Papua Niu Kini ma le Pālemia ‘o le mālō ‘o Toga.

‘O nisi ‘o ta’iala ‘i le fa’aaogāina ‘o lenei sēleni, ‘e aofia ai le fa’aleleia ‘o tūlaga ‘i malae ta’alo, ‘o mea faitino ‘e fa’aaogāina ‘i toleniga, ‘ātoa ai ma le fa’aleleia ‘o fale ‘e fa’aaogāina ‘i vāega ‘ese’ese ‘e le ‘au ta’a’alo, fa’atasi ai ma le fa’aleleia ātili ‘o le nofoaga ‘o lo’o fa’afofoa mai ai tāleni ‘a alo ma fānau.

‘O le fa’anaunauta’iga, ‘ia tapena alo ma fānau ‘i le āga’i atu ‘i le ‘au ‘a tama’ita’i, le Fetū Sāmoa ma le Toa Sāmoa. ‘E lē gata ‘i lea, ‘e fesoasoani ai fo’i ‘i nu’u ma āfio’aga ‘i polokalame ‘o lo’o fa’atūlagaina ‘e le Lakapī Liki, ‘e ‘auga ‘i vāega ‘o le soifua mālōlōina, ‘avea ma ta’ita’i, itū tau a’oa’oga ma le fausia ‘o so’otaga manuia ‘i totonu ‘o nu’u ma āfio’aga.

IMAGE/ATA: Government of Sāmoa