Paū le fua fa’atatau ‘o ‘oloa; ‘ae ‘e lē ‘o mautinoa māfua’aga ‘o le taugātā pea ‘o ‘oloa ‘i le atunu’u

‘Ē lē ‘o mautinoa tonu po’o fea ‘o lo’o tūla’i mai ai le fa’afitāuli ‘o le taugātā ‘o ‘oloa ‘i le atunu’u, ‘ae ‘ua fa’amauina le paū ‘o le fua fa’atatau ‘o ‘oloa, po’o le inflation rate.

‘I se fa’atalanoaga ma le Minisitā ‘o Tupe, Lautimuia Afoa Uelese Va’ai, na ia fa’aalia ai, ‘o se matā’upu ‘e tatau ‘ona silasila toto’a ‘i ai le mālō, po’o fea tonu lea ‘e tūla’i mai ai le lape ‘o le taugatā ‘o ‘oloa.

Na ‘ioe le Minisitā, ‘e iai nisi ‘o ripoti ‘ua fa’ao’o atu ‘i le mafua’aga, ‘ae ‘e ‘ese’ese ‘uma fa’amatalaga mā ‘ua ālaga tatau ai ‘ona silasila ‘i lea matā’upu.

‘O lo’o silasila fo’i le Minisitā, ‘e fautuaina le Komiti ‘o lo’o pūlea le tau ‘o ‘oloa, ma ‘ia fa’atino asiāsiga ‘a le ‘aufaigāluega ‘i le tele ‘o fale’oloa ma pisinisi ‘e lē ‘o mulimulitā’ia le lisi ‘o tau ‘o ‘oloa mai ‘i le Matāgāluega ‘o Pisinisi ma Leipa.

‘Ua iai pisinisi ma kamupāni na fa’asala ‘i lalo ‘o le tūlafono ‘o ‘oloa, ‘i tausaga ‘ua mavae.

‘E māsani ‘ona fautuaina ‘e le Matāgāluega ‘o Leipa ma Pisoinisi le mamalu ‘o le atunu’u ‘ina ‘ia tapa risiti ‘o fa’atauga pe ‘a ‘afai ‘e lē ‘o talafeagai, le tau ma le lisi ‘o ‘oloa ‘o lo’o lisi ‘i lūga ‘o le lisi ‘o ‘oloa.

ATA: Sāvali Newspaper.