Pālemia: Fa’amuta (terminate) aloā’iaina le tofiga ‘o le Afioga ‘iā Laauli Leuatea Polataivao Fosi

‘I se fa’asilasilaga aloā’ia fa’alaua’itele ‘i le aoāuli ‘o le Aso Faraile mai le Afioga ‘i le Tama’ita’i Pālemia Hon. Fiame Naomi Matā’afa, ‘ua fa’ailoa manino mai ai le fa’amutaina aloā’ia (terminate) ‘o le tofiga fa’a-Minisita ‘o le Afioga ‘iā La’auli Leuatea Polata’ivao Fosi Schmidt, mai le Kāpeneta, ‘i lona tofiga ‘o le Minisita ‘o Fa’ato’aga ma Faigāfaiva.

‘O le fa’asilasilaga lenei mai le Pālemia:

O le aso, 10 Ianuari 2025 ua faamuta aloaia (terminate) ai le tofiga o le afioga ia Laauli Leuatea Polataivao Fosi, o le Minisita o Faatoaga ma Faigafaiva.

E le’i mama le iloiloina o lenei mataupu talu ona faailoa faalaua’itele moliaga ua aafia ai le afioga i le Minisita. E pei ona ou faailoa i le vaiaso na te’a nei, o le Faamasinoga o le malu lea faa-le-tulafono, e avanoa mo so’o se tagata Samoa e saili i ai le amiotonu. O le tulaga talafeagai lea e ao ona faagasolo i ai lenei mataupu.

Peitai, e i ai aafiaga o le Malo, ona o le tofiga fa’aminisita. O loo aiaia i le Faavae o le Malo Tutoatasi o Samoa ala faa-le-tulafono e faafoe a’i tofiga taualoa o le Pulega Faatonu. E faapea foi ona faatulaga ai ma aulape mo nei tofiga ina ia faatumauina pea i le amio sa’o (integrity) ma le tauleleia.

Na sa’ausi le laolaoina o lenei mataupu ma le afioga i le Minisita i lenei vaiaso, ma faailoa manino i ai filifiliga e lua mo ia, e pei ona aiaia i le Mataupu 33(3)(e)(o) o le Faavae. O le filifiliga e faamavae mai Iona tofiga, atoa ai ma le filifliga e faamuta Iona tofiga.

O le filifiliga e faamavae mai le tofiga, sa filifilia e le afioga i le Minisita ina ua faatulai ni moliaga e faasaga i ate ia i le 2017, a o avea ma Minisita o Faatoaga i lena vaitau. Peita’i, ina ua tapa Iona finagalo e faamavae mai Iona tofiga i le mataupu lenei, na te le’i taliaina.

Ma i le iloiloina toto’a o lenei mataupu, ua taunuu ai i la’u faaiuga e faamuta le tofiga o le Minisita o Faatoaga ma Faigafaiva e pei ona tauave e le afioga i a Laauli Leuatea Polataivao Fosi, e tusa ai ma le Mataupu 33(3)(e) o le Faavae. E afua atu le faamamaluina o lenei faaiuga i le aso, Aso Faraile, 10 Ianuari 2025.

E mulimulitaia aiaiga o Tulafono ma Faiga Faavae a le Malo i tulaga o le Ofisa ma meatotina o loo faaaogaina mo le tofiga.

Le atunuu e, e i ai ituaso e sousou ai la tatou folauga, peita’i tatou te faatuatuaina pea le Upu a le Atua ‘na te le tuua, na te le tuulafoaina i tatou’.

O le anava a le faigamalo, ia taunapo i le Tulafono, ma e naunau pea ina ia muIimuIita’ia.

ATA: RNZ Pacific / Press Release – Government of Samoa.