‘O se fa’alētonu ‘i fa’amaumauga tusitusi na āfua ai ‘ona tala fa’alua le $150 ‘a le itūmālō Faleata 4

‘Ua fa’amaonia mai ‘e le afioga ‘i le faipule ‘o le itūmālō ‘o Faleata 4, le Afioga ‘i le Igoāmatua ia ‘Ale Vena ‘Ale, ‘o le fa’alētonu ‘o le ‘auala na fa’aogāina ‘e le fono fa’avae ‘e tufaina ai le $150, na saofagā ai le tala fa’alua ‘o sēleni ‘a nisi ‘o ‘i lātou, lea ‘ua toe vala’au ‘e toe fa’afo’i ane le $150 ‘i le fono fa’avae.

Fa’ailoa ‘e le Afioga ‘ia ‘Ale, ‘o le faiga muamua sā taumafai ai le ‘aufaigaluega, ‘o le fa’aogāina lea ‘o fa’amaumauga tusitusi ‘a’ao ‘ae mulimuli ane ‘ona toe fa’aogā ai lea ‘o ‘auala fa’atekonolosi, ma ‘o ‘ī na lē toe saofagā ai le tala fa’alua ‘o le sēleni.

Fa’ailoa ‘e le Igoāmatua ‘ua māe’a ‘ona lōgoa ‘i latou ‘uma ‘ina ‘ia toe fa’afo’i ane sēleni āga’i le ‘ōfisa ‘o le fono fa’avae, ma ‘ua tu’uina atu ai le aso 30 ‘o le māsina lenei ‘o Iuni ‘e fa’agata ai, ‘ao le’i fa’ase’e atu loa suafa ‘o ‘i lātou ‘uma ‘o le ‘a totoe mai ai ‘i lea lisi ‘i le fono fa’atonu ‘o lo’o fa’atonutonuina le polōketi nei ‘a le mālō ‘ātoa ai ma le matāgaluega ‘o leoleo. ‘A e ‘o le to’atele ‘o nisi ‘o ‘i lātou na fa’ailoa ‘e le afioga ‘i le faipule, ‘ua māe’a ‘ona toe fa’afo’i atu sēleni.

IMAGE/ATA: Parliament of Samoa