O ‘ese uma tagata e a’afia i le polokiki lea ei le Lakapi Samoa; P.M. La’aulialemalietoa

E lē to’atasi, e lē to’alua fo’i, ae o le finagalo o le Palemia ma le Mālō, ia o ‘ese uma i latou o lo’o a’afia i le Polokiki mai le tau’aveina o tofiga i totonu o le Lakapi Samoa po’o le Iuni Lakapi a le atunu’u.

E lē māmā i le Palemia, Susuga i le La’aulialemalietoa Leuatea Polāta’ivao Fosi Schmidt, le tulaga fa’aletonu o i’uga ua i ai ‘au masi’i fa’avāomālō a Samoa i le lakapi, ma ua leai ma se tasi o toe fia lagolagoina, ona ua lotolotoi ai i latou o lo’o i le Polokiki i tonu fai a le Lakapi Samoa.

Ua tali manino le Palemia i fesili a Ofisa Fa’asalalau pe ua a’e se tōfā e saini loa i le maliega mo le talosaga i le seleni e fa’amatu’uina mai i le fesoasoani a Ausetalia mo Iuni Lakapi a Fiti, Tonga ma Samoa, ona ua fa’amavae Tuila’epa Lupesoliai Dr. Sa’ilele Malielegaoi, o le sa avea ma Ta’ita’ifono o le Lakapi Samoa, a’o ia fo’i o le Ta’ita’i o le Itu Agai [H.R.P.P.].

Peita’i ua tali manino le Palemia, ua ‘ave lana tali iā Ausetalia, e fa’agaioi pea le talosaga mo le auina mai o lea fa’amanuiaga, ae se’i aga’i pea le Mālō e fufulu ‘ese le Polokiki mai le Lakapi Samoa, ona fa’atoā fa’asaga lelei lea e fa’asoa lea seleni.

O lona uiga, e tatau ma alagātatau ona fa’amavae uma i latou o lo’o avea ma Faipule i le Palemene, o lo’o i totonu o le Komiti Fa’atonu a le Lakapi Samoa.

“O le ‘auga o la’u tusi na ‘ave, o ē o lo’o a’afia i le polokiki, e lē a’afia fua i latou e le’o i totonu o le Palemene, i lo’u talitonuga o ī lea na mafua ai ona fa’apea fa’ai’uga a le Iuni Lakapi.

“Ua fa’apolokiki le faiga o le tatou Iuni, o lea sa tilotilo e tatau ona fa’amamā, ae o lea e le’i mamā uma.

“O lea ua fa’amavae isi, ae le’o fa’amavae isi, lea fo’i ua fa’ailoa mai i le latou tusi na aumai, e lē fa’amavae isi.

“O lea ua tali mai i la’u tusi e lē ō ‘ese le isi vaega, ia lea ua toe tapena la’u tali e ‘ave i ai, ua mae’a fo’i ona o’o mai le Peresetene o le Iuni, ma feiloa’i mai iā te a’u ma fa’ailoa atu ai fo’i le naunauta’iga o le Mālō o lo’o i ai.

“Tu’u le lakapi i lima o i latou e tatau ona aga’i atu e fai le lakapi, ae ‘aua ne’i toe o’o i le tulaga lea e i ai, ua leai se isi e fia lagolagoina le tatou lakapi, ona ua fa’apolokiki ona fai le lakapi.

“E lua vaega sa ou fa’ailoa i le Iuni Lakapi a le Lalolagi fa’apea le Iuni a Ausetalia lea e aumai ai le tupe.

“Muamua, e lē mafai ona ou sainia se mea, pe a lē fa’amamā ma fa’asa’o nisi o fa’afitauli o lo’o tula’i mai totonu o le Iuni Lakapi a Samoa.

“Ae afai e lē ō ‘ese tagata nei ma le Iuni, ona faitalia lea o latou, auā o lea ua aga’i mai Iuni lakapi lāiti i totonu o le atunu’u ma fa’ailoa mai, ua tatau ona fai se isi Iuni Lakapi fou a Samoa.

“Afai o le fa’atūina o le Iuni fou e fīlēmū ma lelei ai le lakapi, ma sagatonu ai le lakapi i le lumana’i, ‘ave i ai ma le tupe lea na aumai e Ausetalia e fa’agaioi ai, o le tulaga lenā la’a fai.

“E lē mafai, lē mafai ona saini i le fesoasoani lea mai Ausetalia, ae aumai toe ‘ave i le mea o lea e fa’aletonu ai le tatou Iuni Lakapi, auā ana lelei le Pulega, aisea o le ā ou lē vave sainia ai le fesoasoani.

“E tatau ona foia fa’afitauli o lo’o aliali mai i totonu o le Iuni, o le ā mauālalo ai le tulaga o ‘au fa’avāomālō a le atunu’u sa masani ona mimita ai so’o se Samoa ona o le tulaga ‘ese o taumafaiga a nai a tatou tamafanau, o le popolega ina ne’i solo i tua le tulaga lelei o ‘au masi’i a Samoa i isi tauvaga i le lumana’i.”

Tusia e: Taunuuga Toatasi

ATA: Savali Newspaper