Mauālalo le aofa’i ‘o tagata ‘ua lesitala ‘i Vaimauga 2, 3, 4, Faleata 1, 2, 3 ma Sagaga 1, 3 ma le 4

‘E lē muta le ‘alaga mai pea ‘o le ‘Ofisa ‘o Faigā Pālota, ‘ina ‘ia tautuanā mā ‘i latou ‘e le’i lesitala, ‘ina ‘ia vave āga’i ‘e lesitala manū ‘e le’i tāpunia le avanoa. ‘Auā ‘o le ī’uga ‘o le tagata ‘e lē lesitala, ‘e sala tupe ‘i le $2,000 po’o le sala fa’afalepuipui ‘e tu’uina mai ‘e le Fa’amasinoga.

‘E maōfa ma le lagona fa’anoanoa, le afioga ‘i le Komesina ‘o Faigā Pālota ma lona ‘Ofisa, ‘ona ‘o Itūmālō Pālota ‘o lo’o pa’ū mauālalo le aofa’i ‘o ā latou tagata lesitala, ‘o āfio’aga ‘o lo’o tū taulaga ‘i ‘Upolu nei.

Saunoa manino le afioga ‘iā Toleafoa Tuiafelolo Alexander John Stanley, ‘e ma’eu le taupati ane ‘o le mamalu ‘o le atunu’u ‘o lo’o āfifio ‘i Itūmālō Pālota ‘i nu’u ‘i tuā ma Savai’i, peita’i ‘o Itūmālō e aofia ai Vaimauga, Faleata ma Sagaga, ‘o lo’o molimauina le tūlaga mauālalo ‘o le aofa’i ‘o tagata ‘ua māe’a lesitala ‘atoatoa mō le Pālota Tele ‘iā Aokuso 2025.

‘I le fa’asōloga ‘o Itūmālō Pālota ‘o lo’o mātuā mauālalo lava le aofa’iga ‘o latou tagata pālota ‘ua lesitala, ‘e aofia ai;

FALEATA #3: ‘e aofia ai nu’u ‘o Vaitele, Vaitele Fou ma Vaitele Uta:‘O Faleata #3, ‘e 4,945 tagata pālota, peita’i na’o le 2,037 tagata ‘ua māe’a lesitala, tusa lea ma le 41.2%. ‘O lona uiga, ‘e 2,908 tagata’ e le’i lesitala, tusa lea ma le 59%.

FALEATA #1: ‘e aofia ai nu’u ‘o Alafua, Lepea, Lotopa, Pesega, Moamoa, Moamoa Fou, Se’ese’e, Tua’efu, Tuana’imato, Sinamoga, Ululoloa, Vaimoso ma Vaitoloa:‘O Faleata #1, ‘e 7,701 tagata palota, ‘ae na’o le 3,678 tagata ‘ua lesitala tusa lea ma le 47.8%. ‘Ona totoe ai lea ‘o le 4,023 tagata ‘e le’i lesitala, tusa lea ma le 52%.

SAGAGA #1: ‘e aofia ai nu’u ‘o A’ele, Faleula, Nu’u, Solomona – Fou ma Tafa’igata:Mō Sagaga #1, ‘e 4,558 tagata pālota, ‘ae na’o le 2,185 tagata ‘ua lesitala tusa lea ma le 47.9%. ‘E 52% tusa lea ma le 2,373 tagata ‘e le’i lesitala.

VAIMAUGA #2: ‘o nu’u ‘e aofia ai Moata’a, Moata’a – Uta, To’omatagi, Vaiala, Vaiala – Uta, Vaipuna, Levili, Vaivase – Tai ma Vaivase – Uta:‘O Vaimauga #2, ‘e 3,534 tagata pālota, ‘ae na’o le 1,810 ‘ua lesitala tusa lea ma le 51.2%, ‘o lona uiga ‘e 1,724 tagata ‘e le’i lesitala tusa lea ma le 49%.

VAIMAUGA #3: ‘o nu’u ‘e ‘i ai Fa’ato’ia, Vini, Ma’agao, Magiagi, Magiagi – Uta, Lelata, Matautu – Tai, Matautu – Uta, Leone, Vaisigano, Vailima, Vaoala, Afiamalu, Afiamalu – Sisifo, Papaloloa, Papauta, Tanugamanono, Tiapapata, Avele, Nafanua, Tanumaleko, Malololelei ma Tiāvī:‘E 6,295 tagata pālota mō Vaimauga #3, peita’i na’o le 53.1% tusa lea ma le 3,340 tagata ‘ua lesitala, ‘ona totoe ai lea ‘o le 47% tusa lea ma le 2,955 tagata ‘e le’i lesitala.

VAIMAUGA #4: ‘e i ai Leufisa, Moto’otua, Malifa, Leififi, Apia, Lalovaea, Lalovaea East, Aai Niue, Maluafou, Matafele, Vaimea, Palisi, Tamaligi, Tau’ese, Tufuiopa, Mulinuu, Fugalei, Savalalo, Saleufi, Sogi, Taufusi, Togafu’afu’a, Aai o Fiti, Alamagoto, Mulivai ma Tuloto:‘E 3,718 tagata pālota, ‘ae na’o le 55.2% ‘ua lesitala tusa lea ma le 2,053 tagata, a’o tagata ‘e le’i lesitala’ e 1,665 tagata tusa lenā ma le 45%.

FALEATA #2: ‘e aofia ai nu’u ‘o Elise Fou, Falelauniu, Si’usega, Talimatau, Tanumapua, Tapatapaō, Tula’ele – Uta, Tula’ele – Tai, Vailoa, Vaigaga, Vaiusu ma Leaupani:‘E 6,511 tagata pālota, ‘ae 56% ‘ua lesitala tusa lea ma le 3,644 tagata, ‘o lona uiga toe 44% tusa lea ma le 2,867 tagata ‘e le’i lesitala.

SAGAGA #4: Levī, Lotoso’a, Mālua, Nonoa, Fatitū, Salepoua’e, Tufulele, Utuali’i ma Alamutu:‘E 3,430 tagata pālota mō Sagaga #4, ‘ae na’o le 1,955 tagata ‘ua lesitala tusa lea ma le 57%, ‘ae mō tagata ‘e le’i lesitala ‘e 1,475 tusa lea ma le 43%.

SAGAGA #3: ‘e ‘i ai nu’u ‘o Leauva’a, Aleisa Sisifo ma Aleisa Sasa’e:‘O le aofa’i ‘o tagata pālota mō Sagaga #3 ‘e 3,464, ‘ae o’o mai le asō na’o le 59.3% tusa lea ma le 2,055 tagata ‘ua lesitala, ‘o lona uiga ‘e 1,409 tagata ‘e le’i lesitala tusa lea ma le 41%.

‘O le tatalo ‘a le afioga ‘i le Komesina, ‘ina ‘ia manatua ‘e tagata pālota ‘uma, ‘o le lesitala ‘o le faitoto’a lea, ‘e fai ai sō latou sao ‘auā le filifilia ‘o ni Ta’ita’i moni mō Sāmoa ma ona ‘upufai, ‘ina ‘ia manuia ai le atunu’u mō nei ma le lumana’i.

‘O le ‘amataga ‘o le māsina fou, ‘o le ‘a tāpunia ai le avanoa mō le lesitala ‘o tagata pālota.

ATA: OEC Commisioner / OEC.