Maua fa’amanuiaga tau sēleni ‘a pepe fou ‘e $100 ‘i le māsina se’ia ‘ātoa le 3 tausaga

‘Ua āloa’ia nei ‘ona fofogaina ‘e le Afioga ‘i le Ta’ita’i ‘o le atunu’u, le fa’ataunu’uina ‘o sē tasi ‘o ‘anavatau na folafolaina ‘i le taimi ‘o faigā pālota, ‘o le maua ai lea ‘e le tagata fou ‘o le fa’amanuiaga tau sēleni ‘e fesoasoani ‘i le tinā mo le tausiga, ma fa’asolo atu ai ‘i lona soifuaga tuputupu a’e.

Na saunoa le Afioga ‘i le Ta’ita’i ‘o le atunu’u, ma toe fa’amanino ‘i lana folasaga, “[‘O] fuafuaga fa’ata’atitia ‘a le tātou mālō ‘e pei ‘ona folasia, ‘e fānau loa le pepe fou, $200 ‘e avatu ‘i le lima ‘o le tinā ‘e ona le pepe, ‘auā le tausiga ‘e ‘āmata ai lona soifua mo le saogalēmū, soifua mālōlōina, a’oa’oga, taumafa, puipuiga, mea ‘uma ‘e puipuia ai le ola ma le soifua ‘o le pepe fou lea ‘ina ‘ia ola soifua mālōlōina, ‘ona tausi loa lea ‘o le tamaitiiti lea mo le 3 tausaga.”

Na ia fa’amaninoina ‘i lana saunoaga, “[‘A] fānau mai, tatau na fai le pepa fānau, tatau na siaki fōma’i ma fai tui, tapena le soifua mālōlōina ‘ina ‘ia mautinoa lelei ‘o lo’o ‘āputiputi le va’aiga ‘o le pepe lenei ‘ina ‘ia manuia. ‘A māe’a loa le tūlaga lea ‘ua taunu’u ‘uma fuafuaga ‘o faiga fa’avae, ‘ona tausi loa lea ‘o le pepe lea ‘e maua lana sēleni $100 ‘i māsina ‘uma se’ia o’o ‘i le 3 tausaga”, le Afioga ‘i le Ta’ita’i ‘o le atunu’u, La’auli’alemālietoa Polata’ivao Fosi Schmidt.

IMAGE/ATA: Government of Sāmoa