Manumālō Felix Soo Choon ‘i tauvaga tusitala ‘a gāluega fa’avaitaimi

‘E 23 tausaga le matua ‘o se alo Sāmoa Felix Soo Choon, na malaga mai ‘i lalo ‘o le polokalame mō gāluega fa’avaitaimi, ‘ua mauaina le tūlaga muamua ‘i le tauvaga tusitala sā faia ‘e le RSE Scheme ‘i se koneferenisi ‘i Niu SIla.

‘O lana tala na tūsia, na filifili mai ‘i le silia ma le 100 ‘o tala ma faʻamaumauga, na ia faʻaalia ai le auala na suia ai ‘e le polokalame mō gāluega fa’avaitaimi lona olaga ma lona ‘āiga talu mai le 2022. Na ‘amata le faigāmalaga mai ‘a Felix ‘i le tele ‘o lu’itau. ‘O Felix ‘e sau mai le āfio’aga ‘o Nofoāli’i ‘i Sāmoa, ma ‘ua lē toe ā’oga ‘i le ā’oga māualuga na iai. Sā feagai ‘o ia ma le gāluega fītā ‘o le tausiga ‘o lona ‘āiga, fa’apea ona uso ‘e to’afā ma ona tuafāfīne ‘e to’alua. Na ia va’aia le faigatā ‘o le ōlaga ‘i Sāmoa ma fa’anoanoa ‘i le va’ai atu ‘i si ona tinā ‘i tūlaga ‘o le mativa, lea na fīnau ai ma ta’ita’iina atu ai ‘o ia mō gāluega fa’avaitaimi. ‘Ina ‘ua fa’ato’ā taunu’u ‘i Hastings, Niu Sila, sā fou iā te ia lea lalolagi. ‘O lana sini ‘autū, ‘o le fa’asaoina lea ‘o se tupe ‘e fa’alautele ai le fale ‘o lona ‘āiga, ma faia se faleui ‘i totonu ‘o le fale ‘i Sāmoa, ‘ina ‘ia ‘aua ai ne’i toe savali mamao lona tinā.

’E ui ‘i le faigatā ma le tau fa’amāsani ‘i le ōlaga ‘i nei atunu’u, ‘ae na ‘ausia ‘e Felix ia naunauta’iga ‘i totonu ‘o le fitu māsina. Na ia faʻatauina foʻi se masini tā lavalava, ‘e taofia mai ai si ona tinā ‘i le alu ‘e tā lavalva ‘i le vai ‘o lō lātou nu’u. ‘O le toe fo’i mai mō le tausaga lona lua, na suia ai le va’ai mamao ‘a lea ali’i. Sā ia sefe le tupe ma le filigā ‘e fa’atau ai se taxi mō lona tamā, lea na maua ai se tupe fa’aopoopo ma fa’atau ai se pusa ‘aisa ‘e fesoasoani ‘i le teuina ‘o taumafa. ‘O le isi fa’amoemoega mō ia, ‘o le tatalaina lea ‘o se tama’i fale’aiga ‘e lata ane ‘i le Kolisi ‘o Nu’uausala, ‘e fa’amalie ai mana’oga ‘o fānau ‘ā’oga ma ō lātou aiga. ‘O lenei atina’e ‘ua atagia ai lona naunauta’i ‘e fa’aāogā avanoa ‘ua saunia ‘e le RSE Scheme  po’o polokalame fa’avaitaimi mō le manuia ‘o ‘āiga ma nu’u.

‘O le fa’alauiloaina ‘o le manumālō ‘o Felix ‘i le tauvaga tusitala,  ‘o se mitamitaga tele mō ‘i lātou ‘uma ‘o lo’o ‘āuai ai. Na fa’alauiloaina le manumalo ‘a Felix ‘i luma ‘o ‘aufaipisinisi ma le ‘aufaifa’atoaga ‘i Niu Sila, ‘i se koneferenisi na faia ‘i le aso 28 ‘o ‘Aukuso ‘i Tauranga. ‘E le’i mafai ‘ona ‘āuai atu Felix ‘i lea sauniga, ona ‘ua toe taliu ‘i Sāmoa, ‘ae ‘o le sui mai le kamupanī ‘a le  Johnny Apple Seeding (JAS) afioga To’osavili Lens Thompson, lea na ia taliaina le fa’ailoga mō ia.

ATA: Felix Soochoon